Yr ysgyfarnog a’r crwban

Ysgyfarnog a wawdiodd y Crwban oblegyd arafwch ei symudiadau. Y Crwban a wenodd, ac a ddywedodd y rhedai yrfa diwrnod a hi pan y mynai, ac y curai hi hefyd. Cytunodd yr Ysgyfarnog; a chychwynasant ar unwaith. Yr Ysgyfarnog, oblegyd ei chyflymder mawr, a redodd mor bell o flaen y Crwban, fel y chwarddodd am ei ben; ond yn teimlo dipyn yn flinderus, fe orweddodd i lawr i gysgu tipyn, gan deimlo yn eithaf hyderus y medrai orddiwes y Crwban yn hawdd wedi deffroi. Cadwodd y Crwban i drotian yn mlaen yn araf, ond yn ddygn, heb aros na throi o’i ffordd unwaith. Cysgodd yr Ysgyfarnog yn hwy nag y bwriadai, ac erbyn cyrhaedd pen yr yrfa yr oedd y Crwban yno o’i blaen hi.

Araf a dygn a ennill y gamp.