La soru di lu Conti

Si cunta e s'arriccunta ca cc'era 'na vota un Conti, riccuni quantu lu mari; e stu Conti avia 'na soru, bedda ca mancu si pò diri, e avia dicidott'anni, e pri forza di gilusia iddu la tinia sempri sutta chiavi 'ntra un quartinu di lu sò palazzu, tantu ca nudda pirsuna l'avia vistu mai e nuddu la canuscía. A limitu e muru di lu palazzu di lu Conti, cc'era lu palazzu di lu Riuzzu. Dda bedda giuvina di Cuntissinedda, guardata e 'nchiusa comu 'na cani, nun la potti tèniri cchiui; tant'è si metti di notti, adàciu, adàciu, e spirtusa lu muru di la càmmara, sutta di un quatru bellu granni. Lu pirtusu currispunnia 'ntra lu quartinu di lu Riuzzu, sutta di n'àutru quatru, tantu ca nun si vidia pri nenti. Una notti idda spinci lu quatru tanticchia; vidi nni lu Riuzzu un priziusu lamperi addumatu, e cci dici:

— «Lamperi d'oru, lamperi d'argentu,

Chi fa lu tò Riuzzu, dormi o vigghia?»

E lu lamperi arrispunniu:

— «Trasiti, Signura, — Trasiti sicura,

Lu Riuzzu dormi — 'Un aviti paura»

'Nca idda trasíu, e si va a curca allatu di lu Riuzzu. Lu Riuzzu s'arrispigghia, l'abbrazza e la vasa e cci dici:

— «Signura, dunni siti, dunni stati?

Di quali statu siti?»

Ed idda, facennu ridiri dda vuccuzza d'oru, arrispunniu:

— «Riuzzu, chi diciti, chi spijati?

Zittitivi, e guditi.»

Quannu lu Riuzzu s'arrispigghiau, e nun si vitti cchiù a lu latu dda bella Dia, si vesti 'ntra un lampu, e chiama: — «Cunsigghiu! Cunsigghiu!» Veni lu Cunsigghiu, e lu Riuzzu cci cunta lu statu di li cosi: — «Chi cosa hê fari, pri fàrila arristari cu mia?» — «Sagra Curuna (cci dici lu Cunsigghiu): quannu vu' l'abbrazzati, attaccativi li so' capiddi a lu vrazzu, quantu si si nni voli jìri, v'aviti a rispigghiari pri forza».

Vinni la sira, e la Cuntissina dumanna a lu solitu:

— «Lamperi d'oru, lamperi d'argentu,

Chi fa lu tò Riuzzu, dormi o vigghia?

E lu lamperi a lu solitu:

— «Trasiti, Signura, — Trasiti sicura,

Lu Riuzzu dormi — 'Un aviti paura.»

Trasi, e si 'nfila 'ntra lu lettu cu lu Riuzzu.

— «Signura, dunni siti; dunni stati?

Di quali statu siti?»

— «Riuzzu, chi diciti, chi spijati?

Zittitivi, e guditi.»

Accussì s'addurmisceru, e lu Riuzzu s'avia attaccatu a lu vrazzu li belli capiddi di la Cuntissina. La Cuntissina pigghia 'na fòrficia, si tagghia li capiddi e si nni va. Lu Riuzzu s'arrispigghia: — «Cunsigghiu! Cunsigghiu! La Dia m'ha lassatu li capiddi e spiríu!» Lu Cunsigghiu arrispunni: — «Sagra Curuna, attaccati a lu vostru coddu un capu di la catinedda d'oru ch'havi a lu coddu idda.» —

L'appressu notti la Cuntissina affacciau:

— «Lamperi d'oru, lamperi d'argentu,

Chi fa lu tò Riuzzu, dormi o vigghia?

E lu lamperi arrispunniu:

— «Trasiti, Signura, — Trasiti sicura.

Lu Riuzzu dormi — 'Un aviti paura.

Lu Riuzzu, quannu l'appi 'ntra li vrazza, cci spija a lu solitu:

— «Signura, dunni siti, dunni stati?

Di quali statu siti?»

E idda rispunni a lu solitu:

— «Riuzzu, chi diciti, chi spijati?

Zittitivi, e guditi.»

Lu Riuzzu si passau 'ntunnu a lu coddu la catinedda d'idda: ma comu s'addurmiscíu, idda tàgghia la catinedda e spirisci. A la matina lu Riuzzu grida: — «Cunsigghiu! Cunsigghiu!» — e cci rapporta la cosa. E lu Cunsigghiu cci dici: — «Sagra Curuna, pigghiàti un vacili chinu d'acqua di zafarana e lu mittiti sutta lu lettu. Com'idda si leva la cammisa, pigghiàtila e jittaticcilla a moddu 'ntra la zafarana. Accussì, quannu si la metti e si nni va, pri lu locu dunni nesci havi a lassari lu rastu.»

A la notti chi vinni, lu Riuzzu priparau lu vacili cu la zafarana e si iju a curcari. A menzannotti idda dici a lu lamperi:

— «Lamperi d'oru, lamperi d'argentu,

Chi fa lu tò Riuzzu, dormi o vigghia?»

E lu lamperi arrispunniu:

— Trasiti, Signura, — Trasiti sicura,

Lu Riuzzu dormi — 'Un aviti paura.»

Lu Riuzzu, quannu la vidi, cci feci la solita dumanna:

— «Signura, dunni siti, dunni stati?

Di quali statu siti?»

E idda arrispunniu cu la solita manera:

— «Riuzzu, chi diciti, chi spijati?

Zittitivi, e guditi.»

Quannu lu Riuzzu si misi a runfuliari, idda si susi côta côta pri pàrtiri, e trova la cammisa a moddu a lu vacili cu la zafarana. Senza diri cìu, torci e spremi ben pulita la cammisa, e scappa senza fari rasti.

Di dda sira in poi, lu Riuzzu l'aspittau ammàtula a la sò Dia, e si dava a la dispirazioni. Ma a li novi misi a picu s'arrispigghia una matina, e si trova curcatu a latu un beddu picciriddu ca paria un àncilu. Si vesti 'ntra un fallanti, e grida: — «Cunsigghiu! Cunsigghiu!» Veni lu Cunsigghiu, e lu Riuzzu cci fa vidiri lu picciriddu, dicennu: — «Chistu e mè figghiu. Ma com'hê fari ora pri canusciri cu' è sò matri?» — E lu Cunsigghiu ha rispunnutu: — «Sagra Curuna, finciti ca muríu, lu mittiti 'mmenzu la clésia, e dati ordini chi tutti li fimmini di la citati vinissiru a chianciri: cu' lu chianci megghiu di tutti, chissa è sò matri.» —

'Nca lu Re accussì fici. Vinianu tutta sorta di fimmini; dicianu: — «Figghiu! figghiu!» e partianu comu avianu vinutu. Vinni a la fini la Cuntissina, e cu li làrimi tanti misi a pilàrisi tutta e a gridari:

— «Oh figghiu! figghiu!

Ca pr'avìriti troppu biddizzi,

Appi tagghiati li me' brunni trizzi:

Ca pri essiri troppu bedda,

Appi tagghiata la mè catinedda:

Ca pri essiri troppu vana,

Appi misa la cammisa 'ntra zafarana!» —

Lu Riuzzu, lu Cunsigghiu e tutti misiru a gridari: — «Chista è la matri! Chista è la matri!» — Allura veni avanti lu Conti cu la sciabbula sfudarata, e la spinci contra sò soru. Ma lu Riuzzu si metti di 'mmenzu e cci dici:

— «Fermati, Conti, virgogna nun è,

Soru di Conti e mugghieri di Re!»

Accussì si maritaru ddà stissu.

Iddi arristaru filici e cuntenti,

E nui ccà chi nni munnamu li denti.

Borgetto.