Lu vecchiu avaru

Cc'era un vecchiu avaru, lu quali si maritau tri voti facennu mòriri li mugghieri. Chistu, allura chi si spusava, a li mugghieri ci facía di pattu di mangiari picca. Iddu ci dicia: — «Siddu avemu a stari 'nsèmmula, tu ha' a fari comu dicu iu.» La matina misi tri linticchi ni la pignata e li fici vùgghiri. Chisti linticchi avianu ad essiri pri la mangiata. Cotti ddi tri linticchi, lu maritu jinchíu di vrodu li piatta, cu ddi tri linticchi divisi. La sira accattau un granu di sardi salati, e lu maritu vosi fatta la sula cuda. La mugghieri facía accussì comu dicía iddu, e si mangiava la menza cuda. Cu ssu modu jianu 'nsicchennu adàciu adàciu, e accussì morsi la prima. Poi iddu si maritau arrèri, e cu la secunna fici lu stissu. A la terza mugghieri pirò, nun ci arriniscíu accussì! — Iddu avía un gaddinaru chinu di gaddìni, e siccomu iddu prima chi si ni jia, urdinava sempri o li tri linticchi, o la sarda salata; la mugghieri ca era scaltra si nni iju ni lu gaddinaru, ammazzava 'na gaddina a la vota, e si facía lu brodu. Comu poi arrivava lu maritu di la campagna, sulía asciari la cuda di la sarda, o li tri linticchi. La mugghieri ci niscíu ddi cosi, e poi fingía di mangiari 'nsèmmula. Si mangiavanu dda testa di sarda e finìanu. Ma la mugghieri 'na matinata, comu vitti ca li gaddini avìanu finutu, e nun ristava àutru chi un sulu gaddu, pinsau di giustu di sciancallu. Comu poi s'arricugghíu lu maritu, idda cci dissi: — «C'è un gaddu sciancatu; lu sapiti chi vi dicu? ni lu mangiamu.» — «Sì, dissi lu maritu. Ma chistu gaddu n'havi a bastari pri dui misi.» — «E comu?» — «Primu si fannu l'ugni, poi lu pizzu; 'nsumma ni l'âmu a cumpanaggiari pri du' misi.» La mugghieri, comu iddu si nni iju 'ncampagna, lu cucíu tuttu e lu sarvau. Poi, comu iddu vinni, ci spijau: — «Lu cucisti lu gaddu?» — «Gnursì.» — «Ma chi cucisti, lu pizzu, e l'ugni?» — «Fici comu mi dicìstivu vui!» Poi la mugghieri lu iju a quadiau ni la pignata cu lu vrodu, lu scinníu e lu misi ni lu fangottu. Comu iddu taliava a la porta d'unni vinía sò mugghieri, iddu s'addunau ca chidda scinnía cu lu fangottu cu lu gaddu sanu, e comu vitti lu gaddu si sucau tuttu e gridava sugghiuzziannu: — «Ih! tuttu, Catarina!... Ih!... tuttu Catarina!...» — La mugghieri, comu vitti ca iddu stava murennu dicennu chissu, chiamau quattru tistimoni e ci dissi: — «Iu mi chiamo Catarina, mè maritu ca sta murennu dici: Tuttu Catarina; pircui la robba è tutta mia.» Fici chiamari lu Nutaru, e chiddu facía 'nsinga cu li manu. La mugghieri sempri dicía: — «Lu viditi? La robba è tutta mia?» Iddu muríu e la mugghieri cu la roba poi si maritau arreri.

Favula ditta, favula scritta,

Diciti la vostra ca la mia è ditta.

Polizzi-Generosa.