Li cumpari di S. Giuvanni

Cc'era 'na vota un maritu e 'na mugghieri, e avevanu un cumpari San Giuvanni. Lu maritu fu arristatu, e lu purtaru a la Vicaría. Lu cumpari era affizziunatu di la cummari, e cci java a lu spissu a visitalla. 'Na jurnata cci dissi idda: — «Cumpari, lu vulemu jiri a vìdiri a mè maritu?» — «Gnursì, cummari;» dici e si parteru. Pi la strata accattaru un gran muluni, — ca era tempu di muluna, — pi purtallu a lu poviru carzaratu. Semu fatti di carni:... lu cumpari e la cummari affinnèru lu S. Giuvanni... e 'nsumma la ficiru grossa. S. Giuvanni però 'un cci la fici passari. Comu iddi junceru a la Vicaría e visitaru lu carciaratu, prima di jirisinni cci vòsiru fari 'na carigna a lu carciareri, e cci dettiru lu muluni. Lu carciareri lu tagghiò davanti d'iddi; ma spaventu! comu tagghia lu muluni cci trova 'ntra lu menzu 'na testa, ca era la testa di S. Giuvanni, ca si cci avía 'nfilatu pi fari avvìdiri li signuri cumpari di lu sò piccatu.

Subbitu l'ha saputu la Giustizia, e l'ha arristatu. Cunfissaru lu tortu ch'avìanu, e lu carciaratu fu misu a libbirtà, e lu cumpari e la cummari fôru 'nfurcati.

Palermo.