trans-8666

In I graf soe was begraven I herde rijc man van haven. Sijn wijf ginc ligghen op sijn graf, Sine wouder niet scheden af, Ende dreef daer haren rouwe groet Om haren man, die daer lach doet. Nu hinc daer I dief vaste an Ane I galghe, den welken I man Te wachtene op sijn hoeft nam. Alst bi der middernacht quam, Doe hadde die man den dorst soe groet, Dat hi liep met groter noet Om drinken daer die vrouwe lach. Hi ginc bet naer, als hise sach. ‘Vrouwe,’ seegt hi, ‘God houde u!’ ‘Ay mi!’ seegt si, ‘wie es daer nu?’ ‘Vrouwe!’ seegt hi, ‘hier es I man.’ ‘Ay mi!’ seegt si, ‘nu vlie dan! Nemmermeer sone willic comen, Of God wilt, daer men man hort noemen. Ay mi!’ seegt si, ‘hier leget doet Mijn soete vrient, mijn beddeghenoet, Die mi soe grote werdichede Ende soe meneghe ere dede.’ ‘Bi Gode!’ seegt hi, ‘lieve vrouwe, Mi es herde leet u rouwe; Maer die levende ende die dode Moeten sceden, al doen sijt node. U en es niet soe goet, als goet verdrach. Dat men verbeteren niet en mach, Verdraghet vrouwe, als ghi best moghet, Ende penst om u jonghe joghet. Vrouwe, ghi sijt soe scone I wijf, Twi verliesdi dus u lijf! Selker vrouwen sate wel Joye, bliscap ende spel. Al was hi goet als hi was, Men vint noch betre dan hi was.’ ‘Beter?’ seegt si, ‘ay mi! ay mie! Wie soude dat sijn, segt mi, wie?’ ‘Vrouwe,’ seegt hi, ‘dat ben ic, Die u ghemint hebbe I stic.’ ‘Ghi hout u scaren, ic wane,’ seegt soe. ‘God weet, vrouwe,’ seegt hi, ‘in doe’ Soe langhe sprac hi ende soe vele, Dat hi haer speelde van sinen spele. Doe keerde die man ende vant verloren Den dief, daer ic af sprac te voren. Doe quam hi toter vrouwen ghegaen: ‘Allaes! wat hebbic ghedaen! Mi es te nacht I dief verstolen, Die mi opt hoeft was bevolen.’ ‘Ja, goede vrient,’ seegt si, ‘wattan! Wi selen daer hanghen minen man. Daertoe wetic raeds ghenoech; Hoe mocht bet sijn ons ghevoech!’ Staphans nam sine uut sinen ghedelve Ende hinken an die galghe selve. Tverwoede wijf es herde coene Haren wille in quade te doene. Die wiven segghen lelijchede, Si doen hem lutten eren daermede, Si blivcns gherne sonder ere, Die goede wijf willen onteren.