El papas i el lavorante

El papás tenía un kampo ke avía de ararlo, i era a media ora de kamino de su kaza.

Fue a la plasa, topó una persona de dos metros i vente de altura i sien i vente de anchura.

La persona le demandó diez drahmes, antes de lavorar.

Vinieron a kaza. Le disho el lavorante: “Para kualo piedrer el tiempo en ir i venir al kampo para komer demanyana? Komeremos agora, i lavoraré asta el medio día en d’una”.

Le plazió esto al papás, kitó kezo, leche, yogurt, pan, dulse, i kumieron de demanyana a las sesh la ora.

el_papaz_i_el_lavoranteKuando eskaparon, le disho el lavorante: “Para kualo piedrer tiempo de ir i venir a la mediodía por komer? Komeremos agora, i ansí lavoro end’una asta la tadre”.

El papás la kumió otra vez, i le kitó peshe, shorvá, karne i fijones. I ansí kumieron de midí a las siete la ora.

Le disho el papás: “Ayde, vamos al kampo!’

Le disho el lavorante: “Para kualo ke pedramos el tiempo en ir i venir a la tadre? Komeremos agora de las sinko ‘la tadre, i yo vo a lavorar despues asta la tadre, i del kampo me puedo ir derecho a kaza”.

Vido el papás ke ya le dio diez drahmes, a komer de manyana i a komer de mediodía. Vido ke no la va kitar, metió la meza, kitó kezo, leche, yogurt, pan i dulse, i la “muntanya” kumió otra vez komer de las sinko ‘la tadre a las ocho de la manyana.

Después tomó unos sakos, los metió debasho del árvol al lado de kaza i se echó a dormir.

Le disho el papás: “Ven, iremos al kampo! Ke te echates a dormir?”

Le disho el lavorante: “Ken puede lavorar, después ke kumió de demanyana, de midí i de la tadre end’una la demanyana?”