Lo Scarafone, lo Sorece e lo Grillo

LO SCARAFONE, LO SORECE E LO GRILLO

Nardiello è mannato tre vote da lo patre a fare mercanzia co ciento docate la vota e tutte le vote accatta mo no sorece, mo no scarafone e mo no grillo; e cacciato pe chesto da lo patre, arriva dove sananno pe miezo de st’anemale la figlia de no re, dapo’ varie socciesse, le deventa marito.

Laudaro assai lo prencepe e la schiava lo iodizio de Sapia Liccarda, ma assai chiù laudaro Tolla, che aveva saputo cossì buono proiere sto fatto che parze ad ogne uno de c’essere presente; e perché, secotanno l’ordene de la lista, soccedeva Popa a parlare, essa se portaie da Orlanno, decenno de sta manera: «La Fortuna è femmena pontegliosa e fuie la facce de li sapute perché fanno chiù cunto de le votate de carte che de le girate de na rota e perzò prattica volentiere co ’gnorante e da poco e non se ne cura – ped avere nore prebeo – de spartire li bene suoie a vozzacchie, de lo muodo che ve farraggio sentire ne lo cunto che secoteia.

Era na vota a lo Vommaro no massaro ricco ricco, chiammato Miccone, che aveva no figlio chiammato Nardiello, lo quale era lo chiù sciaurato caccial’a-pascere che se trovasse mai a la permonara de li vozzacchie: tanto che lo scuro patre ne steva ammaro e negrecato, che non sapeva de che muodo né de che manera ’ndirizzarelo a fare cosa a leviello e che fosse a lenza.

Si ieva a la taverna a scrofoniare co li compagne alivente era fatto corrivo, si pratticava co male femmene pigliava la peo carne e la pagava contr’assisa, si ioquava pe le varattarie le facevano la pizza, lo mettevano ’miezo e se le pigliavano sfritte sfritte, de manera che, de vaga e de riesto, ne aveva frosciato la metate de la robba paterna.

Pe la quale cosa Miccone faceva sempre arme a castiello, gridanno, ammenaccianno e decenno: «Che te pienze fare, sbaraglione? non vide ca la robba mia oramai se ne vace pe l’acqua a bascio? lassa, lassa ste mardette ostarie, che commenzano co nomme de nemice e fenisceno co segnefecato de male! lassale, ca so’ mingrania de lo cellevriello, dropesia de la canna e cacarella de la vorza! lassa, lassa sto scommenecato iuoco, che mette a riseco la vita e se roseca la robba, che ne votta li contente e ne fruscia li contante, dove le zare te arreduceno ’n zero e li parole t’assottigliano comm’a pirolo! lassa, lassa de vordelliare pe sse male razze, figlie de lo brutto peccato, dove spanne e spinne! pe na perchia consumme li purchie e pe na carne sfatta spanteche, redducennote dove n’uosso spunteche, ca non so’ meretrice, ma no maro trace, dove sì pigliato da’ Turche! allontanate dalle accasiune, ca te scraste da lo vizio: remota la causa, desse chillo, se remmove l’effetto. Eccote perzò sti ciento docate: và a la fera de Salierno e accattane tante ienche, ca ’n capo de tre o quatto anne farrimmo tante vuoie; fatte li vuoie, ’nce mettarrimmo a fare lo campo; fatto lo campo, ’nce darrimmo a fare mercanzia de grano e si ’nce ’matte na bona carestia mesurarrimmo li scute a tommola e quanno mai autro te compro no titolo sopra na terra de quarche ammico e sarrai tu puro tritolato comm’a tante autre. Perzò attienne, figlio mio, ca ogne cosa capo ha, chi no accomenza non secoteia». «Lassa fare a sto fusto», respose Nardiello, «ca mo saccio lo cunteciello mio, ca aggio fatto pe tutte regole!». «Cossì voglio io», leprecaie lo patre e, sborzatole li tornise, s’abbiaie a la vota de la fera. Ma non fu arrivato all’acque de Sarno che, drinto no bello voschetto d’urme, a pede na preta che pe remmedio de no rettorio perpetuo d’acqua fresca s’era ’ntorneiata de frunne d’ellera, vedde na fata che se iocoliava co no scarafone, lo quale sonava de manera na chitarrella che se l’avesse sentuto no spagnuolo averria ditto ch’era cosa sopervosa e granniosa.

La quale cosa visto Nardiello se fermai comme ’ncantato a sentire, dicenno ca averria pagato na visola ed avesse avuto n’anemale accossì vertoluso: a lo quale disse la fata che si l’avesse pagato ciento docate ’nce l’averria dato. «Maie a meglio tiempo de chisto», respose Nardiello, «ca l’aggio prunte e leste!». E, cossì decenno, le iettaie ’n zino li ciento docate e, pigliatose lo scarafone drinto a no marzapaniello, corze a lo patre co n’allegrezza che le saglieva da l’ossa pezzelle, decenno: «Ora mo vedarrai, messere mio, s’io so’ ommo de ’nciegno e saccio fare lo fatto mio, pocca, senza stracquareme pe fi’ a la fera, aggio trovato a meza strada la sciorte mia e pe ciento docate aggio avuto sta gioia!».

Lo patre, sentenno sto parlare e vedenno la scatolella, tenne pe cierto c’avesse lo figlio accattato quarche branchiglio de diamante, ma, aperto la cassetella e visto lo scarafone, lo scuorno de lo corrivo e lo dolore de lo ’nteresse foro dui mantece che lo fecero abbottare comm’a ruospo e, volenno Nardiello contare la virtù de lo scarafone, non fu possibele mai che le facesse dire parola, decennole sempre: «Stà zitto, appila, chiude ssa vocca, ammafara, non pipitare, razza de mulo, iodizio de cavallo, capo d’aseno! ed a sta medesima pedata torna lo scarafone a chi te l’ha vennuto e co sti ciento autre docate che te dongo comprane tutte ienche, tornanno subeto e vì che non te cecasse lo Brutto fatto, ca te ne faccio manciare le mano a diente!».

Nardiello, pigliatose li denare, s’abbiaie verzo la Torre de Sarno ed arrivato a lo medesimo luoco trovaie n’autra fata, che pazziava co no sorece che faceva le chiù belle motanze de ballo che mai potisse vedere. Nardiello, stato no piezzo attoneto a vedere li dainette, le contenenzie, le crapiole, le pontate e le scorzete de sto animale, appe a spiretare ed addemandaie a la fata si lo voleva vennere, che l’averria dato ciento docate. La fata azzettaie lo partito e, pigliatose li frisole, le dette lo sorece drinto la scatola.

E, tornato a la casa soia, mostraie a lo nigro Miccone la bella compra fatta; lo quale fece cose mardette, sbattenno comm’a no purpo mazziato, sbruffanno comm’a no cavallo fantasteco e, si non era pe no compare che se trovaie a sto greciglio, l’averria pigliato bona la mesura de lo scartiello. All’utemo lo patre, ch’era ’nfomato de bona manera, pigliato ciento autre docate le disse: «Avvierte a non fare chiù de le toie, ca non te resce la terza.

Và donca a Salierno e compra li ienche, ca pe l’arma de li muorte mieie, si tu la sgarre, negra mammata che te figliaie!».

Nardiello co la capo vascia sfilaie a la vota de Salierno ed, arrivato a lo stisso luoco, trovaie n’autra fata, che se pigliava sfizio co no grillo, lo quale cantava cossì docemente che faceva addormentare le perzone. Nardiello, che sentette sta nova foggia de roscegniuolo, le venne subeto golio de fare sta mercanzia ed accordatose pe ciento docate se lo mese drinto na gaiolella fatta de cocozza longa e sproccole e se ne tornaie a lo patre. Lo quale, vedenno lo terzo male servizio, le scappaie la pacienzia e dato de mano a no tutaro lo frusciaie de bona manera, che fece chiù de Rodamonte.

Nardiello, quanno le potte scappare da le granfe e pigliatose tutte tre st’anemale, sfrattaie da chillo paiese e toccaie a la vota de Lommardia, dove ’nc’era no gran segnore, chiammato Cenzone, lo quale aveva na figlia uneca c’aveva nomme Milla, che pe certa ’nfermetate l’era venuta tanta malenconia che pe lo spazio de sette anne continue non s’era vista ridere; tanto che desperato lo patre, dapo’ avere tentato mille remmedie e spiso lo cuotto e lo crudo, fece iettare no banno: che chi l’avesse fatta ridere ’nce l’averria data pe mogliere.

Nardiello, che sentette sto banno, le venne ’n crapiccio de tentare la sciorte soia e, iuto ’nante a Cenzone, s’offerse de fare ridere Milla. A lo quale respose chillo signore: «Stà ’n cellevriello, o cammarata, ca si po’ non te resce lo fatto ’nce iarrà la forma de lo cappuccio!». «Vagace la forma e la scarpa!», leprecaie Nardiello, «ch’io me ’nce voglio provare, e vengane chello che venire vole!».

Lo re, fatto venire la figlia e sedutose sotto lo bardacchino, Nardiello cavaie da la scatola li tre animale, li quale sonaro, ballaro e cantaro co tanta grazia e co tante squasenzie che la regina scappaie a ridere, ma chianze lo prencipe drinto a lo core suio, pocca ’n virtù de lo banno era astritto de dare na gioia de le femmene a la feccia dell’uommene. Ma, non potenno darese arreto de la prommessa, disse a Nardiello: «Io te do figliama e lo stato pe dote, ma co patto che si tu non consumme fra tre iuorne lo matremonio io te faccio manciare da li liune». «N’aggio paura», disse Nardiello, «ca fra sto tiempo songo ommo de consummare lo matremonio, figliata e tutta la casa toia!». «Adaso, ca iammo, disse Carcariello, c’a la prova se canosceno li mellune!».

Fatto adonca la festa e venuta la sera – quanno lo Sole comm’a mariuolo è portato co la cappa ’ncapo a le carcere de l’Occedente – li zite se iezero a corcare: ma perché maliziosamente lo re fece dare l’addormio a Nardiello, non fece autro tutta la notte che gronfiare. La quale cosa continuato lo secunno e lo terzo iuorno, lo re lo fece iettare a lo serraglio de li liune, dove Nardiello, vedennose arreddutto, aperze la scatola de l’anemale, decenno: «Pocca la sciorte mia m’have carriato co n’ammaro straolo a sto nigro passo, non avenno autro che ve lassare, o belle anemale mieie, io ve faccio franche, azzò pozzate ire dove ve pare e piace» L’animale, comme foro scapole, comenzaro a fare tante bagattielle e ioquarielle che li liune remasero comme statole; ’ntanto parlaie lo sorece a Nardiello, ch’era già co lo spireto a li diente, decennole: «Allegramente, patrone, ca si be’nce hai dato libertà, nui te volimmo essere chiù schiave che maie, pocca ’nce hai cevato co tanto ammore e conservato co tanta affrezzione ed all’utemo ’nce hai mostrato signo de tanto svisciolamiento co farence franche. Ma non dubitare: chi bene fa bene aspetta; fa bene e scordatenne. Ma sacce che nui simmo fatate e, pe farete vedere si potimmo e valimmo, vienence appriesso, ca te cacci da sto pericolo».

Ed abbiannose Nardiello dereto lo sorece fece subeto no pertuso quanto ’nce capesse n’ommo, pe lo quale co na sagliuta a scaletta lo portaro ’ncoppa a lo sarvo; dove, mettennolo drinto a na pagliara, le dissero che le commannasse tutto chello che desiderava, ca no averriano lassato cosa da fare pe darele gusto. «Lo gusto mio sarria», respose Nardiello, «che si lo re ha dato autro marito a Milla, me facissevo tanto de piacere de non fare consumare sto matremonio, perché sarria no conzomare sta negra vita». «Chesso e niente è tutto uno», resposero l’animale, «stà de buon armo ed aspettace a sta capanna, ca mo ne cacciarrimmo lo fraceto!».

E, abbiatose a la corte, trovaro che lo re aveva maritata la figlia co no gran signore todisco e la sera stessa se metteva mano a la votte. Pe la quale cosa l’animale, trasute destramente a la cammara de li zite, aspettaro la sera che, fornuto lo banchetto – quanno esce la Luna a pascere de rosata le Gallinelle – se iezero a corcare e perché lo zito aveva carrecato la valestra e pigliato carta soperchia, a pena se ’ncaforchiaie drinto a le lenzola che s’addormette comm’a scannato. Lo scarafone, che ’ntese lo gronfiare de lo zito, se ne sagliette chiano chiano pe lo pede de la travacca e remorchiatose sotto coperta se ’nficcaie lesto lesto a lo tafanario de lo zito, servennolo de soppositario ’n forma tale che le spilaie de manera lo cuorpo, che potte dicere co lo Petrarca d’amor trasse inde un liquido sottile.

La zita, che ’ntese lo squacquarare de lo vesentierio, l’aura, l’odore, il refrigerio e l’ombra, scetaie lo marito. Lo quale, visto co quale sproffummo aveva ’ncenzato l’idolo suio, appe a morire de vregogna ed a crepantare de collera ed, auzatose da lo lietto e fattose na colata a tutta la perzona, mannaie a chiammare li miedece, li quale dettero la causa de sta desgrazia a lo desordene de lo banchetto passato.

E comme fu la sera appriesso, tornatose a consigliare co li cammariere, furo tutte de parere che se ’mbracasse de buone panne, pe remmediare a quarche nuovo ’nconveniente; la quale cosa fatta se ieze a corcare. Ma, addormentatose de nuovo e tornato lo scarafone a farele lo secunno corrivo, trovaie ammarrate li passe; pe la quale cosa tornaie male contento a li compagne, decennole comme lo zito s’aveva fatto repare de fasciatore, argene de tillecarelle e trincere de pezze. Lo sorece, che sentette chesto, disse: «Viene co mico e vedarrai si so’ buono guastatore a farete la schianata!». Ed, arrivato sopra la facce de lo luoco, commenzaie a rosecare li panne e a farele no pertuso a leviello dell’autro, pe dove trasenno lo scarafone le fece n’autra cura medecinale de manera che fece no maro de liquido topazio e l’arabi fumme ’nfettarono lo palazzo. Pe la quale cosa scetatose l’ammorbata zita ed, a lo lummo de na lampa visto lo delluvio citrino c’aveva fatto deventare le lenzole d’Olanda tabiò de Venezia giallo onniato, appilandose lo naso foiette a la cammara de le zitelle e lo nigro zito, chiammanno li cammariere, se fece na longa lammentazione de la disgrazia soia, che con fonnamiento accossì lubreco aveva commenzato a fermare le grandezze de la casa soia.

Li fammeliare suoie lo confortavano, consigliannolo che stesse ’n cellevriello la terza notte, contannole lo cunto de lo malato pedetaro e de lo miedeco mozzecutolo, lo quale avennose lassato scappare no vernacchio, lo miedeco, parlannole letterumme, disse: «Sanitatibus!»; ma, asseconnanno n’autro, isso leprecaie: «Ventositatibus!», ma, continuanno la terza, isso aperse tanto de canna e disse: «Asinitatibus!». Perzò si lo primmo lavore a musaico fatto a lo lietto nozziale s’è ’ncorpato a lo desordene de lo magnare, lo secunno a lo malo stato de lo stommaco, pe lo quale se ll’era scontrato lo cuorpo, lo terzo se ’mputarà a natura cacazzara e sarrà cacciato a fieto ed a vergogna. «Non dubitare», disse lo zito, «ca stanotte, si dovesse crepare, voglio stare sempre all’erta, non lassannome vencere da lo suonno ed otra a chesto pensarrimmo che remmedio potimmo fare ad appilare lo connutto maistro, azzò non me se dica tre volte cadde ed a la terza giacque! Co st’appontamiento adonca, comme venne l’autra notte, cagnato cammara e lietto, lo zito se chiammaie li cammarate, cercannole consiglio circa l’ammafarare lo cuorpo, che non le facesse la terza burla, che ’n quanto a lo stare scetato no l’averriano addormentato tutte li papagne che so’ a lo munno. Era fra chiste serviture no giovane che se delettava de l’arte de pommardiero: e, perché ognuno tratta de lo mestiero suio, consigliaie a lo zito a farese no tappo de ligno, comme se fa a li masche.

La quale cosa fu subeto stampata ed, acconciatolo comme aveva da stare, se iette a corcare, non toccando la zita, pe paura de non fare forza e guastare la ’menzione e non chiudenno l’uocchie, pe trovarese lesto ad ogne recercata de stommaco.

Lo scarafone, che non vedette maie dormire lo zito, disse a li compagne: «Ohimè, chesta è la vota che restammo chiarite e l’arte nostra non ’nce serve pe niente, pocca lo zito non dorme e non me da luoco a secuteiare la ’mpresa!». «Aspetta», disse lo grillo, «ca mo te servo!», e, commenzanno a cantare docemente, facette addormentare lo zito. La quale cosa visto lo scarafone corze a farele de se stisso serenga, ma, trovata chiusa la porta e ’mpeduta la strata, tornaie desperato e confuso a li compagne, decenno chello che l’era socciesso. Lo sorece, che non aveva autro fine che servire e contentare Nardiello, a chella medesema pedata iette a la despenza ed adoranno da fesina a fesina ’mmattette un arvaro de mostarda de senapa, dove ’mroscinatose con la coda corze a lo lietto de lo zito e ne sodonse tutte le forgie de lo naso de lo nigro todisco, lo quale commenzaie a sternutare accossì forte che sbottaie lo tappo co tanta furia che, trovannose votato de spalle a la zita, le schiaffaie ’m pietto accossì furiuso che l’appe ad accidere.

A le strille de la quale corze lo re e demannanno che cosa aveva, disse che l’era stato sparato no pedardo ’m pietto. Se maravigliaie lo re de sto spreposeto, che co no pedardo ’m pietto potesse parlare, ed, auzato le coperte e le lenzole, trovaie la mena de vrenna e lo tappo de lo masco, c’aveva fatto na bona molegnana a la zita, si be’ non saccio che le facesse chiù danno o lo fieto de la porvere o la botta de la palla.

Lo re, visto sta schefienzia e ’ntiso ch’era la terza liquidazione de sto strommiento ch’isso aveva fatto, lo cacciaie da lo stato suio e, consideranno ca tutto sto male l’era socciesso pe la canetate usata a lo povero Nardiello, se ne deva le punia ’m pietto e mentre, pentuto de chello c’aveva fatto, faceva lo trivolo, se le fece ’nanze lo scarafone, dicennole: «Non te desperare, ca Nardiello è bivo e pe le bone qualetate soie mereta essere iennero de vostra magnifecenza e si ve contentate che venga, mo lo mannarrimmo a chiammare». «Oh che singhe lo ben venuto co sta nova de veveraggio, o bello anemale mio! tu m’haie dato la vita, tu m’haie levato da no maro d’affanne, pocca me senteva no rangolo a lo core de lo tuorto fatto a chillo povero giovene! perzò facitelo venire, ca lo voglio abbracciare comm’a figlio e darele figliama pe mogliere».

Sentuto chesto, lo grillo zompanno zompanno iette a la capanna dove steva Nardiello e, contannole tutto lo socciesso, lo fece venire a lo palazzo reiale, dove ’ncontrato ed abbracciato da lo re le fu consegnata Milla pe mano e, ricevuta la fatazione da l’anemale, deventaie no bello giovene, che mannato a chiammare lo patre da lo Vommaro stettero ’nsiemme felice e contiente, provanno dapo’ mille stiente e mille affanne ca

vene chiù ’nt’ un’ora che ’n cient’anne».