Namakɔrɔba halakilen

Nìn nsiirin tàra kungosògoẁ ni ɲɔgɔn cɛ. Don dɔ kɛr'a la : Kɔ̀rɔ̀jara dara hami na diyɛn taabolo kɔrɔ la. À kɔsa ìn nɔ man di : mùso tɛ cɛ̀kan mɛn, den tɛ fàkan mɛn, dɔgɔ tɛ kɔ̀rɔ̀kan mɛn. À hamina. - Ha ! À ko : 'Ni n ma fɛ̀ɛrɛ kɛ nìn na, an kà ɲɔgɔnye kɛ nìn na, ko à ko bɛ gɛ̀lɛ̀ya.

Kɔ̀rɔ̀jara ŋunana kungo rɔ. À ko : - Hunnnh- jɛn ! ... Hunnnh-jɛn ! ...Hunnnh-jɛn ! ... Ni ǒ dùn mɛnna sògoẁ fɛ̀ kà ban, ù bɛɛ bɛ taa. Ù b'a dɔn kɔnɔganko dě dòn. Sògoẁ wulila. Ù bɛ girin na kà taa. Gɔngɔn ye kàbàkolo mìnɛ fǎn bɛɛ fɛ̀. Ɛ ! Sòsoẁ ye ù kɛ sàmaẁ tulo kɔnɔ. (Ò y'a sɔ̀rɔ : màa min b'a rɔ ni kuma bɛnà kɛ ò ta kàn, ǒ hàlàkìlen dòn, ò ye nàmàkɔ̀rɔ̀ba ye. Ò kɔ, tɔ̌ nìnnu bɛɛ lajɛ̀len nalonnen dòn, ǹka ù ma hàlàki.) Nàmàkɔ̀rɔ̀ba girinna k'o bi fùra bɛɛ dàn, à bɛ dùgùkolo ɲùgu. Àle taara sògo tɔ̌ẁ kɔ̀n. Ù bi taa ɲɔgɔn ye kùlùbà-kolonfuga min na, k'à lamini ko wolonfìla kɛ ò la, kà tla kà t'i da kà sìnɔgɔ k'à sɔ̀rɔ sògo tɔ̌ẁ ma se... Hán ! Sòsoẁ ko : Kɔ̀rɔ̀sama kà fɛ̀rɛn mìnɛ. (ò y'a sɔ̀rɔ, ò bi taa yɔrɔ min nɔ, ò ka kan kà Fàlàjɛ ni Bàmàkɔ ɲɔ̀gɔ̀nko bɔ). Fiɲɛ min bi tà sàma fɛ̀ fànga yɛ̀rɛ kamà, n'à ma fiyɛn bɔ dɔɔnin-dɔɔnin, à tɛ se kà fɛ̀rɛn mìna. I dùn tɛ se kà tɛ̀mɛ, Kɔ̀rɔ̀jara bɛ yɔrɔ min na, hali n'i y'i sàra, i tɛ se kà tɛ̀mɛ blen dɛ ! Fànga yɛ̀rɛ ye à sababu ye.

Ù taara kà taa se yènni nɔ sa. Ɛ ! N dwa Sònsan ye ù ka kiritigɛmasa ye. Nàmàkɔ̀rɔ̀ba ko : - N dwa Sònsan, ne fɔlɔ sera, ne fɔlɔ sera, ni à bi kɛ kùnko o kùnko ye, kuma min fɔtɔ maa kɛ, ni hɛrɛ dòn, n fɔlɔ sera! - ko : Ɔ! Ko ò si tɛ baasi ye. Ǔ nàna ɲɔgɔn sɔ̀rɔ. Kɔ̀rɔ̀jara kumana ni kungofɛnẁ ye. ' Diyɛn bilisara, jɔ̀yɔrɔ tɛ màa na, màa t'i jɔ̀yɔrɔ dɔn... Ǒ tùma, mùso sàba bɛ n bolo, an bɛnà à kɔɲɔ filɛ, mùso bɛ ɲini ni ŋànìya min ye, à bɛ ɲini ni wari ye wa, à bɛ ɲini ni sanu ye wa, ò tɛ fɔ aw si ye fɔlɔ, bɛɛ kà taa à kɛ làbɛn ye ! Ni kɔɲɔ kɛra, min maa bɛɛ dàn, fɔ t'a ye, ǒ tùma mùso bɛ di ǒ mà.' Aa ! Nàmàkɔ̀rɔ̀ba k'ò rɔ : - Nǐn ɲɛ̀na !' Komin àle hàlàkìlen dòn, tɔ̌ẁ nalonnen ǹka ù ma halaki, ù bɛ se kà ko bɛɛ kɛ kà dàn tɔ̌ẁ dànyɔrɔ la. Àle tɛ sɔ̀n ǒ mà. Hàlàki ye à sababu ye.

Ù taara kà taa làbɛn kɛ. Nàfolo bɛ min bolo, sanu bɛ min bolo, ù ye ǒ dònìni damìna kà taa à kǔn da kolonfuga rɔ. Aaa ! Kɔ̀rɔ̀jara kɔnɔwaati sera. À ko : - N dwa Sònsan, ntàman tà, i kà kɔɲɔdon fɔ mɔ̀ɔẁ ye, bɛɛ lajɛ̀len kà nà, làbɛn nìn kà kɛ. Sani ǒ ntàman kà tà sa, Ɛ ! ù ko : - Kɔnɔgan kɛlen : minnu ka nàfolo bɛ kà dòni kà taa, k'ǔ màràyɔrɔ tɛ. Ù ye ci bìla ngɔndugutigi mà ko kɔɲɔbuguko bɛ cogo dì? (Aw b'aw tulomǎjɔ̀ ngɔnẁ nìnnu ni ɲɔɔnjaabicogo...fɛ̀, ò b'a to aw kà se kà Hadamadenya taabolo dɔn. Ò bɛ fɔ kà sìri yɔrɔ min na : mùsoẁ ni ǔ cɛ̌ẁ cɛ dòn.) Ngɔnẁ ko : - Ò man gɛ̀lɛn, k'u bɛ se kà bùgùda kelen jɔ̀ lɛri {sanga} kelen ko ù ka jàma ka ca, wà ! ù bi baara kɛ.

Kɔ̀nɔẁ nàna kà nà ɲɔgɔn sɔ̀rɔ à kɛnɛ kàn. Kàbini ò kɛra, Ɛ ! ngɔncɛ nàna kuma caya : - Dàcɔ, Dàcɔ ! Kɔ̀ncɛ, (Kɔ̀ncɛ), (Ɛ) ! ci tɛ, bɔ̀ tɛ ! Ɛ ! ò bɛ kɛ cogo dì ? Ò bɛ kɛ cogo dì ? Ngɔn ka kuma ka ca ! Kàbini ò kɛra, mùso bɛ̀ ò jaabi ?: À ko - N na cɛ̀, n na cɛ̀ bɛ sin kà kuma dùrùndu tèn dɛrɛtɛtɛtɛtɛ k'à da mɛnɛ nɛ nɛ nɛ nɛ!, hakilisigi yɔrɔ tɛ, jìgìsìgìyɔrɔ tɛ.

Ò ye ngɔnmuso kumakan ye, ko ǹka ... ko denẁ kàn'o lamɛn dɛ ! Ko ǔ k'ǔ dège fɛn na, 'fǎ tɛ se kà min kɛ, ko fǎ bɛ kɛ dunan ye so kɔnɔ'. Ngɔnmuso la laadilikan ye nìn ye kà denẁ laadi ni ò ye, (màaẁ kà ù hakili to ò rɔ ! : I cɛ̌ ye kuma caya cogo o cogo ye, e kɔ̀ni kàn'a fɔ ko e b'i denẁ lafàsàya, e kà cɛ̌ laadi kà tla kà denẁ laadi, e ye laadilibaa dè ye.) Ǒ tɛ̀mɛ̀nen sa, Ngɔncɛ nàna kà nà ngɔnmuso jaabi ko : - Salòn, n ye n ka bùgu sìri, salòn n ye n ka bùgu sìri ntɛnɛ-nɛnɛnɛnɛ ! ɲìna n k'à sìri yɔ̀rɔ̀cɔɔ ! Salòn n ye n ka bùgu sìri ntɛnɛ-nɛnɛnɛnɛ, ɲìna n k'à sìri yɔ̀rɔ̀cɔɔ !

Ò ye àle fana ka kuma ye. Kàbini ò kɛra, Hɛ́ ! denẁ girinna, ǔ dònna tu rɔ, dɔẁ b'a tìgɛ, dɔẁ bɛ nà à rɔmìna, dɔẁ bɛ à kason, kà sin kà bùgu jɔ̀ ò yɔrɔnin kelen pe bɛɛ k'à ban, fɔ Dwa Sònsan nàna ko : - Tìɲɛ na, ko : ngɔnẁ ! Aw ye aw se kɛ, k'a' ye bùgùko to tàn! Kàbini ù ye ǒ bùgùko lajɔ̀ sa, Sònsan ko : à bɛ ... àle bɛ à la dàfe mìna. Ò ye i sònsoro gelekàla kɔ rɔ, ò ye ntàman tà. Ò bɛ san fɛ̀, ò bɛ kàn k'a la ntàman gɔ̀si. Gelekàla b'a fɔ ko : - A' ye- Sìlaa nìn, a'm'àn taa farakolomadwa jɔ̀. Gelekàla kumakan ye ò ye. (Ò kɛlen, ò farakolomadwa ye mùn ye ? Ɲɔgɔnbɛnyɔrɔ fɛn o fɛn bɛ ni à ka gɛ̀lɛn, ò ye farakolomadwa dě jɔ̀tɔ ye.) Bɛɛ lajɛ̀len girinna kà taa !

Ù lajɛ̀len sa, nàmàkɔ̀rɔ̀ba k'àle fɔlɔ sera k'àle tɔgɔ kà sɛbɛn. Ò tɔgɔ sɛbɛnnen, ko : - Jɛnni wɛrɛ bɛ sɛbɛn ? Ù y'a bɛɛ mɛn Nàmàkɔ̀rɔ̀ba la ko : - Bàkɔ̀rɔ̀nin tɔgɔ sɛbɛn ne kɛ̀rɛ fɛ̀. Ò sɛbɛnnen, ko : - Jɛn wɛrɛ bɛ sɛbɛn ? - ko : Jàkuma tɔgɔ sɛbɛn ! Jàkuma sɛbɛnnen, ko : - Jɛn bɛ sɛbɛn jàkuma kɛ̀rɛ fɛ̀ ? - ko : Ɲinɛ. Ɲinɛ sɛbɛnnen, ko : Jɛn bɛ sɛbɛn ò kɔ? - ko : Sɛgɛ sɛbɛn. I kà dònòkɔ̀rɔ̀nin sɛbɛn ǒ kɛ̀rɛ fɛ̀, i kà dàn ǒ mà. Anẁ màa wɔɔrɔ dè bɛ ɲɔɔn sɔ̀rɔ mùso nìnnu nɔ̌ fɛ̀ fɔlɔ. Ni anẁ kɛɲɛna, cɛ̀ wɛrɛ na ɲini mùso la ko : n'o ntɛ, à y'o ye.

Sònsan taara ò ɲɛfɔ kɔ̀rɔ̀jara ye. Kɔ̀rɔ̀jara ko : - N dɔgɔ Sònsan, ko : wara min ko : n kǔn ka cì, ɲàmà t'ò la, ko N Dwa Sònsan, nàmàkɔ̀rɔ̀ba hàlàkìlen dòn. N'i b'a kɛ min ye, i kàn'a to à kà kisi dɛ ! Ko : e kɔ̀ni k'i da lanɔ . À b'a yɛ̀rɛ t'o rɔ dè, n'ò ntɛ, màa t'a t'o rɔ, ko màa hàlàkìlen, hali i b'i yɛ̀rɛ kɛ̀lɛ n'i dùsùkun ye; (ò) kɔ, n'i nalonnen dòn, màaẁ maa fɛn fɔ i ye, i b'ò mɛn, i yɛ̀rɛ fɛnɛ tɛ i yɛ̀rɛ kɛ̀lɛ. Nkà n'i hàlàkìra, i b'i yɛ̀rɛ dòn da fɛ̀. Ala k'ǎn bɛɛ kisi hàlàki mà !

Kàbini ò kɛra, ǔ nàna ɲɔgɔn sɔ̀rɔ kɛnɛ kàn. Nàmàkɔ̀rɔ̀ba ko ... : - K'ǔ k'à fɔ k'o tɛ ɲà min kɔ, k'ǔ kà sin k'à kɛ ò ye ..., k'ǔ k'à kɛ kɔ̀mɔ̀fɔli ye, ko ǒ dè bɛ sin kà ban joona, k'o maa kɛɲɛ kɛ, k'o bi kɛ ò ye han ! N dwa Sònsan ko : - Ɛɛɛn ... ! ko : kɔ̀mɔ̀fɔli ! - ko kɔ̀mɔ̀fɔli. - ko : kɔɲɔ ni kɔ̀mɔ̀fɔli, - ko ǒ dòn dɛrɛ ! Kɔ̀rɔ̀jara ko : - Ha ! à tɛ baasi ye ! K'o kà kɛ ò ye ! à maa kɛ min ye,, k'ǒ nà kɛ an bɛɛ ɲɛ na. Kàbini ò kɛra, jàkùmànin ko : - Jàma ... kà i ɲɛmajɔ̀ ! K'àle kɔ̀ni jɛ̀nna mùso kɔ k'à di ɲinɛ mà, ko : ù ti kɛ ɲɔgɔn na màa ye diɲɛ nɔ bilen dɛ, ko ǹka ko : n'i ma mùɲu, i bɛ dòn màaẁ gàsi rɔ, k'i nà tila kà dòn Ngala gàsi rɔ, ko àle bɛ to ni à la sìlàmɛ̀ya ye, ko : ayi !... ɲinɛ kà mùso tà, - ko 'Ɔ! k'ò tɛ baasi ye'. Sɛgɛ fɛnɛn ko : - Dònòkɔ̀rɔ̀nin kà mùso tà, bawò dònòkɔ̀rɔ̀nin bɛ tɔtɔtɔ ni koladege minnu na nìn ye àni kà nisɔndiya, ko : àle tɛ se ò la, ko kàbini Ala ye àle sɛgɛ da ko fìn tɛ àle ɲɛ kàn ɲǎnko jɛ, ko àle ma dège nisɔndiya la k'i ni màa màlòbali maa bɛ̀n, k'o bɛ dimi dòn à la . Ò fɛnɛ jɛ̀nna à la ò kɔ. Ù ko : - Nàmàkɔrɔ, ko à bɛ cogo dì? K'i fɛnɛn tɛ jɛ̀n ?' À ko : - Sàafurulayi ! K'àle tɛ jɛ̀n, ni à bɛ kɛ min ye, ko : à bi kɛ ò ye. À ko : - Bàkɔ̀rɔ̀nin ! Ko : E don ? - Àyi ! Ko ni cɛ̌ẁ ma kɛ̀lɛ, ko sebaa tɛ̀ dɔn, ko ǔ kà bolo bìla bɔn rɔ ! Ko à rɔ̀tigɛ nà dɔn.' Kɔ̀nɔ dɔ bɛ kungo rɔ ko : bɔn. Ǒ tùn ye bɔnbafɔla ye. À tɔgɔ fɔlɔ ko : ǒ tùn ye kɔ̀nɔ̀jɛli ye anẁ tùn bɛ ɲɛnajɛ yɛ̀rɛ kɛ à la, ǹka bɔnfɔ nìn, ù y'a twa yɛ̀lɛ̀ma ko : bɔn, bɔn.

Ǔ nàna kà nà ɲɔgɔn sɔ̀rɔ. Ò y'a sɔ̀rɔ : bɔn y'a la màaẁ weele, ò ye gwɛndennin weele à ka cunfɔla ye, kà kùme-kùme weele à ka bàràdènfɔ ye, kà tɔnkɔnɔ weele pintinfɔ ye, ò maa i da fɛ̀tɛ kà ban, ǔ màgo tɛ foyi rɔ bilen. À bɛɛ b'i lamɛn ò la. Gwɛndennin nàna kà nà, kàla karila ò tulo la k'ò tnɔ-tnɔ, k'ǒ gɔ̌s'à tulo rɔ k'ǒ gɔ̀s'à tulo rɔ. Ò ye màakan fɔ à ye, à y'ò da. Bɛɛ y'i ta kɛ tèn. Bàràdènfɔ àni pintinfɔ nàna ù ta suruku ta rɔ k'ò fóron tulo kɔrɔ. Ù bɛɛ lajɛ̀len kɛlen k'à màakan fɔ, ǔ yɛ̀lɛ̀nna bon ìn balan. Ù y'a rɔjɛ, Nàmàkɔ̀rɔ̀ba ko : - A' m'an k'a rɔjɛ!'. Ò hakili bɛ k'a fɔ ko yala bàkɔ̀rɔ̀nin bi min kɛ, ò ti kɛ dɛ ! Bàkɔ̀rɔ̀nin taara kà taa. Fɔlɔmaaẁ tùn b'a fɔ ko : n'i ye bǎ ye kà bǎ bìn ko dɔ jǔ bɛ dɛ̀nɛ na. À taar'i sɛ̀mɛ dɛ̀nɛ na. Nàmàkɔ̀rɔ̀ba bɛ'n kà fǎn bɛɛ yògòro. Bàkɔ̀rɔ̀nin ... ò la dùlɔ̀kìkòlònnin bɛ à kan na, ò cɛ sìrìlen dòn, ò b'i bolonin fìla kɔrɔtà. À ye kulokanɲa sàba kɛ fɔlɔ : - Bɔɔɔn ! ... Bɔɔɔn ! .... Bɔɔɔn!' ... - Konɔgɔn tɛ, konɔgɔn tɛ, konɔgɔn tɛ ! Ù ye ɲɔgɔn sɔ̀rɔ, ù kɛlen kà ɲɔgɔn sɔ̀rɔ, nàmàkɔ̀rɔ̀ba bɛ kà fìlì-fala tùma min, À b'i bolonin fila wuli san rɔ ɲɛsɛɛnwu !à b'i sènnin fìla cun dùgu mà jɛsɛ ! De k'à bòonsìnin bùusùbɛɛsɛ dùgu la. Bàkɔ̀rɔ̀nin ka dɔ̌n bɛɛ filɛ ye i kɔrɔ nìn ye dɛ !

Kàbini ò kɛra, ò fana kɔɲɔmuso ɲɛbɔra ǒ fɛ̀, ò bɛ k'a tɛgɛrɛẁ fɔ ǒ kùn. Yàa ! Ò tɛ bɛ̀n nàmàkɔ̀rɔ̀ba mà. Bàkɔ̀rɔ̀nin bɛ ǒ fàsànkòkɛ la tùma min na, Nàmàkɔ̀rɔ̀ba y'i yɛ̀lɛ̀ma gɔrɔɔwu ! Bàkɔ̀rɔ̀nin bɛ bolo lɔ. À ye kuma sàba fɔ. À ko : - Ha ! Ngala !... Kùúkù ! ... Hɛɛ leyu ! Ò kuma sàba fɔlen ... 'Hɛ Leyu' maa fɔ yɔrɔ o yɔrɔ bamanankan la, bɛɛ b'i tulomǎjɔ̀. Ǔ nàna kà nà à rɔjɛ ko : - Mùn bɔlen bɛ à rɔ, Nàmàkɔ̀rɔ̀ba ? À ma kuma. - Ko : 'Àyi ! Ko : Aw k'an to ɲɔgɔn na, ò kɔ, ò tɛ ɲà. (Màaẁ bi yɔrɔ dɔ fɔ, n'aw ye kɛ̀lɛ̀kɛ̀laẁ ye : a' y' aw fara, aw kàn'aw to ɲɔgɔn na'). Kuma ma sɔ̀rɔ nàmàkɔ̀rɔ̀ba da ko : - Wà ! An tɛ taa sàrìya la dè Jàra fɛ̌ yèn? À ko : - Àyi ! ko : 'Bàkɔ̀rɔ̀nin dè ye àle npu mìnɛ, ko à ye n npu, à ye n npu, - Ko : à ma dɔ wɛrɛ kɛ i la npuli dàma kɔ. - Ko : À ye n npu. - Ko : 'Bàkɔ̀rɔ̀nin, k'o bɛ cogo dì ?' - Ko hán-hàn! Ko : n tùn bɛ jàgòdɔn la n na mùso ɲɛkɔrɔ. Mùso kɛlen kà tɛgɛrɛ fɔ ne kùn, de kà tila k'à fɔ k'o bi kɛ kùnko ye ne nɔ̌ fɛ̀. - Ko : Nàmàkɔ̀rɔ̀ba ! k'i fɛnɛn t'i dège jàgòdɔn la ko : Yàa mùso nà ɲɛbɔ i fɛ̀ ? - Ko : Minkɛ̀, ne ye se dɔ̀n wɛrɛ la wuyi kɔ dè ? Ò y'a kɛ kàsi ye, Ò y'i kɔ dòn.

Kàbi ò kɛra, bàkɔ̀rɔ̀nin jamana tun, à y'i bolonin fìla kɔrɔtà ko : - Bɔɔɔn ! A' ye wòlo wuli ! Bɔɔɔn ! Ǒ kɔ̀ni b'o kɛ, à b'i sènnin fìla cun dùgu mà k'ǐ bòonsìnin bùusùbɛɛsɛn. Kàbini ò kɛra sa, mùso ɲɛnajɛra fɔ à tilara kà taa i ɲɔ̀ngirin bàkɔ̀rɔ̀nin kɔrɔ. Ò la, fugarɔsogo nìnnu bɛɛ ko : - Anw m'an kà wuli ko, ò kɔ ko : dimi bɛ dòn anw nɔ bàkɔ̀rɔ̀nin fɛ̀. Min ta ye sanu ye, min ta ye wari ye, ù bɛ'n kà ǒ dòniẁ tà kà taa à da bàkɔ̀rɔ̀nin kɔrɔ. Min maa di mùso mà, ù bi taa ò da bàkɔ̀rɔ̀nin kɔrɔ. Bàkɔ̀rɔ̀nin na jàma juguyara.

Nàmàkɔ̀rɔ̀ba dimikojugu, ǒ yɛ̀lɛ̀màtɔ bába ! ǒ kàman karila. Kàman karilen, Sònsànnin ko kó : - Ò ye jàgòdɔn sɔ̀rɔ̀len ye e fɛ̀ táan ! kàna jɔ̀ dɛ ! (Nàmàkɔ̀rɔ̀ba la sènsàbàlàboli sɔ̀rɔ̀la tàra yèn dè). Ò bi bolo kelen kɛ kà dɔ rɔmìna. Ò y'a juguya. Kɔ̀rɔ̀jara kɔ̀ni dalen k'ì ɲɛtugu, ò y'a dɔn ko : gàsì tɛ àle la, màntɔ̀ɔrɔ̀ si tɛ àle la yènni nɔ. Sògò si tɛnà bɔ min bɛ gàsi tìgɛ àle la. Kàbini bɛɛ lajɛ̀len bɛ kà ù la nàfolo di bàkɔ̀rɔ̀nin mà, ò dimi dònna nàmàkɔ̀rɔ̀ba la, Nàmàkɔ̀rɔ̀ba ko : à tɛ ɲà min kɔ, k'an b'a kɛ ò ye, k'o bɛ bàkɔ̀rɔ̀nin si latunu. Gɔngɔn dùrùndùlen, ù y'a nɔɔni. À y'i gwan yɔrɔ min na, kàman ìn karilen gɔrɔɔwu ! Bàkɔ̀rɔ̀nin bɛ bolo lɔ k'o bɔ̌ mìna. Ǒ bɔ̌ mìnàlen, ò ko : - Sùko bɔlen 'lɔ ɔ́ , sùko bɔlen 'lɔ ɔ́' ! Kàbi ò fɔra dɔrɔn, bɔnba ... min bɛ bɔnbafɔ la, ò y'i bùgùbugu kà nà Nàmàkɔ̀rɔ̀ba bùgɔ k'ǒ tàlon k'ǒ fìli. Ò bɛ sògoẁ bɛɛ gɔ̀si. Nàmàkɔ̀rɔ̀ba bùgɔ̀len k'ǒ tàlon k'ǒ fìli, gwɛ̀dɛ̀nin fana dònna ko rɔ k'à talon. (Jinɛ ni màa tɛ kelen ye. Ǔ nàna nàmàkɔ̀rɔ̀ba tà san ni dùgu cɛ, kà nà ni à ye.) Ǔ nàlen ni nàmàkɔ̀rɔ̀ba ye sa ! ... ǔ nàna kà n'à lada ko : - Nàmàkɔ̀rɔ̀ba ! k'e yɛ̀rɛ ..ko :. bunɛ kà bɔ ò rɔ ko : 'Bunɛ ye jɛn ye ? ... E ! Nàmàkɔrɔ dòn ! K'e yɛ̀rɛ ko : ko nɔgɔn tɛ, ko à gɛ̀lɛ̀yàlen jɛn kàn ? k'e nàmàkɔ̀rɔ̀ba dòn !

Ko Wà, cɛ̌ẁ maa ɲɔgɔn ye yɔrɔ o yɔrɔ, cɛ̀bàkɔ̀rɔ̀kɛlɛ ye gàrìjɛgɛ dè ye! Nàfolo bɛ n bolo, ò tɛ n bolo, ò tɛ ! i kàn'i yɛ̀rɛ kɛ sebaa ye bɛɛ ɲɛ. I k'ǐ yɛ̀rɛ to tɔ̌ẁ toyɔrɔ lɔ... A'm'an kà ɲɔgɔn nɔbɛ̀n, an kà ɲɔgɔn kan mìnɛ.

Min ye nìn kɛ nìn kɛcogo rɔ, k'à bɛɛ jɔ̀yɔrɔ jìra i la, kɔ̀rɔ̀jara y'a bɛɛ jɔ̀yɔrɔ jìra i la kà bɛɛ yɔrɔ yìr'i la... Bònya min bɛ òlu ni ɲɔgɔn cɛ, sògo tɔ̌ẁ ye ǒ tà an Hadàmàdenẁ ɲɛ na . An fana man kan k'à kɛ cogo si, k'an bɛ fìli ɲɔgɔn mà, kà dɔ bìla yɔrɔ dɔ la k'à sɔ̀rɔ, ò tɛ yèn.

...Wà ! Sàlamàlèku !