Musokɔrɔnin fitiriwale

Nin kɛra masakɛ dɔ ye. Masakɛ in, ɲɔ tun bɛ a fɛ, nka a ka ɲɔ tun tɛ sɔrɔ wari la, a tun tɛ sɔrɔ fɛn wɛrɛ la, delili tun t’a sɔrɔ. Masakɛ in ko: « «ni ale bɛ ɲɔ di mɔgɔ o mɔgɔ ma, fɔ i ka diɲɛ labankan fɔ a ye, n’o tɛ, ale ka ɲɔ tɛ di i ma. Bɛɛ y’i sen don k’i bolo don, mɔgɔ si ma masakɛ ka ɲɔ sɔrɔ. Musokɔrɔnin dɔ tun bɛ yen, den tun t’a fɛ, a ye denw sɔrɔ, denw bɛɛ banna, fɔ a mɔdennin kelen. Musokɔrɔba tun tɛ ɲɔ sɔrɔ a yɛrɛ la. A ye masakɛ ko mɛn, a ko: « «A! n mɔden, an ka wuli ka taa masakɛ fɛ bi, (wala)sa an ye se ka surɔfana sɔrɔ, n’o tɛ kɔngɔ bɛna an faga dɛ! U wulila, u ye sira minɛ. U bɛ sira fɛ. Sira kɛrɛ fɛ, si dɔ bɛ yen, nkooro bɛ o wo la. U sera o ma. Nkooro y’i kan bɔ, a ko: «A! Musokɔrɔba, aw bɛ taa min, e ni e mɔdennin?» A ko: «A! ne ye masakɛ ko mɛn ko ɲɔ bɛ a bolo, nka kɔngɔ digilen ne la, ne bɛ taa (wala)sa masakɛ ye ɲɔ di ne ma». A ko: «yali diɲɛ bankan bɛ e da wa? Masakɛ ka ɲɔ tɛ sɔrɔ mɔgɔ fɛ wari la, a tɛ sɔrɔ mɔgɔ fɛ delili la fɔ i ka diɲɛ labankan fɔ». A ko: «A! Diɲɛ labankan tɛ ne fɛ». A ko: «Ne bɛ diɲɛ labankan fɔ i ye. N’i taara, i b’a fɔ masakɛ ye ko diɲɛ bɛ laban fitiriwaleya kan; ko n’o kɛra, i na ɲɔ sɔrɔ». Musokɔrɔba taara. A taara se masakɛ ma. A ko: «Masakɛ, su rɔ, ne sira kɔngɔ la, n ma to dun. Ayiwa, ne nalen bɛ ka i deli, i ka se ka ɲɔ di ne ma». A ko: «Diɲɛ labankan bɛ i da wa?» A ko: «Ɔwɔ» Ko: «Diɲɛ labankan ye fɛn jumɛn ye?» A ko: «Masakɛ, ko: « «diɲɛ bɛ laban fitiriwaleya de la». «E! A! K’i ye diɲɛ labankan sɔrɔ».

A ye ɲɔ kɛ musokɔrɔba kun, ka dɔ di a mɔdennin ma. U y’u kɔdon, u nana. U sera nkooro ma, k’a kɛ ikomi u bɛ tɛmɛ dɔɔnin, musokɔrɔba hakili jiginna nkooro la, a y’i kɔyɛlɛma ka na. A ko: «A! Ɲɔ sɔrɔla, nka, a tɔ ye nako ye. Nkooro y’i kun bɔ wo la gɛrɛ!» A ye nkooro minɛ. A ko: «A! ne ye ɲɔ sɔrɔ masakɛ fɛ, nka ne bɛ e kɛ ɲɔ na ye». A ye nkooro tɔn tigɛ, k’o bila a ka ɲɔ kan. A nana so. A ye to tobi ka nkooro tobi o kɔrɔ. A ye nkooro sogo bila a da, nkooro kolo balanna a kan na. Musokɔrɔba sara.

Ayiwa, musokɔrɔba kɛra fitiriwale ye nkooro ma. Hali bi, o fitiriwaleya, o tɔ bɛ sen na. (O ye mɔgɔ jumɛn taamasyɛn ye. Ne ɲɛ na, o ye Zida bɔnsɔnw de ye.)