Umatanaka

Anata phistana, walja jaqinakawa umaraskatäna, siwa.

Akham satätanawa: Ch'alla Sawalla, warmipasti, Tumitila; Tatalmari muniripasti, Tuminkita; Ariyanuna warmipasti, Tumasa. Uka urux iritita urutänawa. Uywanakaru Ch'allaña urutänawa. Jayp'uruxa uywanakaru k'illphaña qalltapxatäna. Alkulita umxatt'asa, ukhamaw k'illphaña tukuyapxatäna. Ukatxa ulla manq'apxatäna, wasitatwa umañ qaltapxatäna. Umapxatäna, umapxatäna jayp'üxatänawa.

Ukatxa Tuminkitawa qhayqhaña qalltatäna; kirkisisa, thuqusisa sarnaqxatäna; Tatalmaristi Ariyanumpi, Ch'alla Sawallampi walja kunar iñtatanaka ajiyasipxatäna. Ch'alla Sawallax akham Tatalmarirux satäna:

-Nayax Ch'alla Sawalla lamp'a turuni karaju, phuchajas waka charat charaniraki karaju. Janiw yäqksmati akch'arusa Tatalmarillu karaju…!!

Tatalmaristi, wal kulirasisaw nuwañ munatäna. Ukarskamaxa intix jalantkatänawa, chhaphu chhaphüxkatänawa. Ukjkamasti, uka umatanakaxa ajiyaskama qarjtapxatänawa. Utaruwa mantxapxatäna, ukanxa umaraskapxakitänawa, janiwa amuyasxapxatänati.

Tuta ch'amakaxatänawa. Ukatxa Tatalmarixa anqaruwa chhuxarasiri mistutäna. Chanka chanka jani amuyasisa; wurunakaruwa chhuxkatatäna; warusti, may mat'aqsutayna. Ukatxa Tatalmarixa, akham satayna:

-Ch'alla Sawalla jan lawampi, jan lawampi, chachästa ukax ch'akupura nuwt'asiñani.

Sasaw wurunakarux satänaxa. Ukatxa Tatalmarixa takintarakitaynawa. Wurusti, mat'aqkamixa kayu p'akkatatäna. Ukatxa umatax satänawa:

-Wasta wasta, kumpari atipjistawa, jichha akat khuysarux jäqamawa, yäqamawa. Sasaw jan suma amuyasisa wurunakaruxa satäna.