La Ghiuttuna

Si cunta ca c'era 'na vota un maritu e 'na mugghieri. Lu maritu facennu la matina la spisa, purtava la carni e la pasta dicennu a la mugghieri: — «Còcila, ca cu sti cosi n'avemu a 'ricriari.» Iddu niscíu; e la mugghieri iju ni la cucina pri cociri ed apparicchiari sti cosi. Comu eranu menzi cotti, ammucciuni di lu maritu, accuminsau a tastarli; tastannu tastannu si li mangia tutti. Poi ci vinni 'na furnicía pinsannu chi si arricugghía sò maritu. E pinsau di dìrici chi si li mangiau la gatta. Sona minzijornu, e si ritira lu maritu facennu primura pri mangiari; e la chiamau di nomu. — «Conza la tavula, Nina, ca ora mangiamu; già lu pitittu mi stà affirrannu pri darreri lu cozzu.» La mugghieri cunfusa: — «Chi haju a cunzari tavula! La gatta si mangiau tutti cosi...» Lu poviru maritu, vidennu chi idda di jornu in jornu facía accussì, niscíu pri dispiratu, mortu di pitittu, 'mmezzu la chiazza. Pri sorti, mentri era passiannu, ci 'ncuntrau un cumpari e ci dissi: — «Cumpari, chi aviti?» — «Chi vogghiu aviri! ca sugnu afflittu e angustiatu! Havi tri jorna chi nun mangiu. Accattu la spisa, la portu a mè mugghieri e idda si fa mangiari tutti cosi di la gatta...» Si vôta sò cumpari e cci dici: — «Nun c'è nenti; vi lu dugnu iu lu riparu; vi dugnu 'na nuci, 'na miènnula, 'na castagna, e 'na nucidda; li mittiti ni li spicùna di la càmmara, e cu chisti vi fazzu vidiri ca mangirriti vui sulu e idda no.» Lu maritu, fattu jornu, si livau e iju a pigghiari la spisa. Dici a la mugghieri: — «Ccà c'è la spisa; basta pirò chi nun ti la fai mangiari di la gatta.» Idda a minzijornu iju ni la cucina a lu solitu pri mettiri a cociri la carni. A mezza cuttura, la misi a tastari stinnennu la manu. Comu spingi la manu a la vucca senti diri da li quattru anguli di la cucina:

«Olà! che si farà!

Senza lui non si mangerà!

Comu chi idda senti la vuci, si metti a trimari tutta jittannu vintusità 'n cuntinuazioni. Stizzànnusi di ccà e di ddà dissi 'ntra idda: — «Comu veni mè maritu, ci lu dicu ca ccà nun ci pozzu stari cchiù, ca ci sunnu li spirdi.» Vinni sò maritu, e mangiau. Idda pirò nun vosi mangiari, ca ci fici la 'ncagna ca vulía adduata la casa. Iddu ci rispunnía: — «Basta chi com'ora mangiu iu, ca sugnu mortu di fami.» Comu idda si misi a linguiari, sò maritu ci detti sulfati. La mugghieri sempri dicía: — «Ccà nun ci pozzu stari cchiù!» Cangiaru casa sempri e mittennu lu maritu la nuci, la nucidda, la miènnula, e la castagna a li spicùna di la casa, idda si ridducíu a livàrisi ddu viziu.

Favula ditta, favula scritta,

Diciti la vostra ca la mia è ditta.

Polizzi-Generosa.