Basya Adyuku koni

Mi kownu mi yere yu abi wan tutu-oi. Ma na ini yu kondre nowan man man fu bro a tutu-oi. Mi kownu, ma ne mi kon begi yu taki: - Mi kownu, pruberi efu mi sa bro a tutu. Ne mi kownu taki: - Ay yu boy Anansi, yu kan teki a tutu, dan yu pruberi efu yu bro a tutu. Ne mi teki a tutu, mi poti a tutu, mi bro a tutu, ba: - Pan pan pan pan! Ma bifosi mi doro a pranasi na opo Kotka di den e kari Morgudan, ne mi nyan ala a tutu, ba: - Fan fan fan fan! Teri en go, ma mama un go teri en kon. - Teri en go, ma mama un go teri en kon.

We yu si, a singi di mi singi de, hn!, na wan srafuten tori. Yu ben abi wan pranasi na opo Kotka, den e kari Suksesi. Dan yu ben abi wan pranasi na ini Motkriki, den e kari Dagrâti. Ma na Suksesi yu ben abi wan man dape, den ben e kari en basya Adyuku. Ma now, te yu kon owru na ini a pranasi te, dan granmasra no wani si yu moro. Bika a taki yu e tan nyan nyanyan fu soso. Bika yu no man wroko moro, dan yu no mu tan na ini a pranasi ini moro. Dan den pikin fu yu, dan den mu go koti wan pikin busi, dan den meki maka-oso, dan den poti yu. Ma pranasi nyanyan yu no kan nyan moro. Bika san dan? Den srafu ben e kisi nyanyan ala wiki. Efu a pikin abi wan yari, tokoe a e bigin kisi lansun. Pondo e kon a foto, a kon teki batyaw. O-nyanyan den ben e gi den. A bâna nanga batyaw. Nanga a weti maka, dati den abi fu weri go na kerki, nanga a braka maka. Den uma e kisi tu braka maka pangi. A fu heri yari. Ma now yu ben abi wan mama den ben e kari mama Amba. Dan en man ben nen Kwami. Dan a ben abi wan manpikin, den ben e kari Akampe. Dati na en fosi manpikin. Tu manpikin a ben abi. Dan a wan a ben gi en nen Adyuku. Ma te Akampe komopo a baka gron - dati a ben e wroko -, ma efu a kon na oso - a mama no man wroko moro, a papa no man wroko moro - kaba mama Amba kari en, a e piki: - San yu e kari mi? Yu grani kaba, yu no kan dede? Anga moeilijkheid a mi tapu! Te Adyuku kon, a kari en, a taki: - Adyuku? A taki: - Ya mi mama? - Kon dya mi boy. Adyuku e go. A taki: - Mi mama, yu nyan kaba dan? A taki: - N'n! - Mi mama, san yu wani nyan? A taki: - We a no wan pikin tonton yu mu bori gi mi? Adyuku e go a gotro, a kisi srika, a srepi fisi, a kon, a fon en mama anga en papa tonton gi den. Sonten a e puru sika gi den. Satra bakadina, te a komopo a wroko, dan a kon puru sika, krin den futu gi den. Sonde mamanten a e teki a makapangi fu a mama, a gowe go wasi. A e teki a pikin krio fu a papa, a go a liba, a wasi, a drey. Ma a papa ben abi wan koni. Dan a luku duun. We yu si a tori di mi e gi yu de, dan a tata luku Adyuku, dan a kari mama Amba, a taki: - Amba, kon. Amba lelele, kari mama Amba kon. Amba lelele, srafûma, kari mama Amba kon. Amba lelele, srafûma, kari mama Amba kon.

We na mama Amba a e kari so. A taki: - Amba lelele, kari na mama gi mi. Amba lelele, srafûma, kari na uma gi mi. Hn! Bika mama Amba, Adyuku na en pikin. Ma a yuru di a papa si fa Adyuku e libi anga en, dan a e kari mama Amba, fu den taki makandra fu den gi Adyuku a koni. Ne mama Amba e gowe, teki pasi e go anga en tiki. Ne a papa bari gi en taki: - Mama Amba lelele, kari na uma gi mi. Mama Amba lelele, srafûma, kari na uma kon. Dan mama Amba dray kon. Nomo a taki: - Mi uma, we luku, u abi tu boy dya. Tata Gado leni un tu boy. Ma a wan bigiwan, yu no si, a e si un leki noti. Ma Adyuku, te a kon, a e puru sika gi unu, a e kisi watra gi un fu wasi un skin. A e go a gotro, a e go srepi fisi kon, a e kisi srika, a e kisi krabu, a e bori brafu gi unu. We luku, mi abi wan koni dya di mi tata ben leri mi. Ma mi no pruberi fu mi srefi. Ma meki un pruberi en gi Adyuku. A mama no piki. Twarfu dey langa a papa e begi en. Mama, den abi swaki ati so. Ma na mama dati ben abi a tranga ati, a papa ben abi a swaki ati. Di fu tinadri dey, nomo a papa kari Adyuku a wan sey, a taki: - Adyuku! Adyuku taki: - Ya mi papa. A taki: - Kon dya boy. Efu un gi yu wan wroko, yu sa du en? Adyuku taki: - San mi papa wani. Bika mi papa wroko te yu kon grani. Now granmasra taki: nowan enkri suma no mu tan na ini pranasi. Hala den trawan mesandel den bigisma, den houders fu den, te den dede. Ma tog mi tyari yu kon dya a mindri busi. Mi meki wan oso fu yu anga mi mama. Mi e tyari nyanyan kon gi unu. Dùs te yu si un tapu bro, mi poti un na ondro doti, dan mi sa kaba anga unu. A papa taki: - So mi boy. A taki: - We yu sabi san mi o seni yu? Yu mu go na busi. Dan yu mu suku a mira di den e kari wrokoman. Dan yu puru na ati tya kon gi mi. Adyuku teki prakseri. Nomo a mama sidon a wan sey. Di Adyuku e prakseri de, ne a mama bari, a taki: - Yu sabi na odo di mi e bari de-i? Hay, mi pikin wani sabi na odo di mi e koti de. Go na mindri busi, go teki na ati fu na mira den e kari wrokoman. Dan yu sa sabi na odo di mi e bari de. Adyuku teki prakseri te. Adyuku go, a sribi. Tamara mamanten a go a busi. A waka, a waka, a waka, a waka, a waka, a waka, a waka, te a doro twarfu yuru. A no man miti noti. A go na ondro wan bon. A dokun di a ben tyari, a koti wan pisi, a nyan. Ma a yuru di a nyan a dokun, nomo a si wan krabdagu kon na en fesi. A ten dati den meti ben e taki. Nomo a krabdagu taki anga en. A taki: - We mi yonkuman, fa yu tan? Adyuku taki: - Mi krabdagu, fa yu tan? A krabdagu taki: - Angri e kiri mi ba. A di mi si yu e nyan, ne mi kon. Adyuku taki: - We san mi e nyan, mi no sabi efu yu sa nyan en. Na kasaba dokun mi tyari. Efu yu sa nyan en, dan mi sa gi yu. A krabdagu taki: - We, di yu nyan en, a no kiri yu, a no kan kiri mi. A opo en katasú, a teki a afu dokun, gi a krabdagu. A krabdagu nyan. A krabdagu sidon na en sey, a bigin prey anga a krabdagu. A yuru di a prey te wan pisi anga a krabdagu - un ben de tranga dreyten nanga tranga son -, dan fa a feni a kowrupe, dan a winti kon bigin way, dan a sribi bigin kiri en, dan a dyonko. Ma a yuru di a dyonko, a fadon a wan pikin sribi. A krabdagu sidon na en sey. Te a sribi te wan pisi ten, a krabdagu si a no e wiki, a krabdagu krabu en anga en finga, a wiki. Ne a krabdagu tagi en taki: - We mi yonkuman, yu fadon a wan pikin sribi, ma mi tan dya, mi waki te yu sribi, fu noti no du yu. A taki: - Ay mi krabdagu, mi e taki yu tangi. A krabdagu aksi en taki: - Ma pe yu e go dan? A taki: - We luku dya, na ini mi pranasi ini, pe mi de, sodra yu si yu wroko gi granmasra te yu kon grani, dan yu no e kisi lansun moro. We so hala den trawan, den bigisma fu den, di den no e kisi lansun moro, den ferferi anga den, den mesandel den te hala dede. Ma mi dati, mi kon meki wan oso na busi. San mi man prani, mi prani.

Dan mi tyari mi mama - a no man wroko moro, a nen mama Amba - go poti a busi nanga mi papa. A lansun di mi e kisi, a dati mi anga den e prati, nanga san mi e wroko nengregron. A krabdagu taki: - O! A taki: - Ma pe yu e go dan? A taki: - We a no mi papa seni mi taki, meki mi kon a mindri busi, meki mi go suku na ati fu a mira den e kari wrokoman gi en. We yu si, a dati mi e go suku. A krabdagu taki: - O! We mi yonkuman, efu mi ben sabi en, mi ben sa sori yu. Ma di yu e go de, waka, masra Gado sa de anga yu. Adyuku teki pasi, a waka, a waka, a waka, a waka, te a kon doro wan pikin kriki. Ma a yuru a doro a kriki, a koti wan tiki, a wani go abra a kriki, a firfiri a tiki, ma a si wan bun bigi pisi... * Adyuku koti wan tiki, a firi. Ma pe a e firi so, nomo a si wan bigi pisi udu didon so. Ma na udu ben didon leki fa a kriki didon so. Ma na udu dray en srefi. Ma ala dati, san na a udu? Na wan bigi kayman. Te yu wan go abra a kriki dati, dan na a kayman baka yu mu waka. Nèt Adyuku wani poti en futu fu go abra na udu, a krabdagu dape de. A krabdagu kon, a taki: - Mi yonkuman, mi miti yu baka. A fu yu ede meki mi kon dya. Adyuku taki: - So? Krabdagu taki: - We, yu no feni na ati fu a mira den e kari wrokoman ete? A taki: - Nono! We, mi doro a kriki, dan now mi wani go abra. Krabdagu taki: - We, yu no mu go abra, bika yu si, na bigi udu di yu si yu wani abra dape de, nowan libisma e kan abra dya. Na wan bigi kayman. Èn ala den tra pispisi udu di seti de, sodra yu si yu sa poti yu futu, na soso kayman. Fa yu si yu e miti a watra, so den o nyan yu. Dùsu dray baka, meki mi tyari yu go. Adyuku waka. A krabdagu teki fesi. A yuru di a waka, a waka te wan pisi, nomo a go, a miti wan bigi bon, a gersi na sibi sibi a bon ondro. Ma fosi a doro, dan a krabdagu tagi en taki: - We luku, yu si yu e go miti wan bigi bon dape de. Ma te yu go na ondro a bon - a bon sibi leki suma e go sibi en - ma te yu go dape na ondro a bon, no tan nowan henkri yuru. Bika te yu go na ondro a bon, a o gi yu fu yu sidon, a o gi yu fu yu kanti didon srefi. Ma no prefuru, waka so tranga leki yu kan. A yuru di Adyuku waka te a go doro na ondro a bon so, wan switi winti way na ondro a bon sote - hn! Adyuku wani tanapu. A prakseri san a krabdagu ben tagi en. A waka tu futu, a tanapu. A prakseri san a krabdagu ben tagi en. A winti e komopo ala sey fu en. A yuru di a pasa a skadu te, nomo a yere wan sten na en baka: - Hn! Disi a fosiwan! Na a sten piki so. We dati, a sten di piki dape de, dati na pe hala den busimama fu a busi e libi. Ma libilibi sma no e kon pasa dape de. A yuru di Adyuku pasa dape, a kon miti wan kanti udu, a mu go abra na udu dati. A krabdagu ben dape wantron. A krabdagu tagi en, a taki: - No abra na udu, mi yonkuman, bika na udu di yu e si de... * We, a yuru di a krabdagu doro na en, a taki: - We i si, na udu di yu wani abra de, na a Grandagwe, na a gran heygron aboma di den kon pina dyaso, di granmasra ben meki sweri anga en fu a pranasi taki: hala yari a sa gi en dri nengre fu a nyan. Bika hala yari granmasra ben mara sukru moro leki den tra pranasi di de. Ma di en ati ben e kaba den nengre, ne yu si - yu ben abi den bigi suma dati fu pranasi - ne den kon tyari en kon pina dya. Dan toku ete granmasra, di den suma dati kon grani, toku a yagi den puru na ini pranasi, taki den pikin mu tyari den gowe. Dosu mi yonkuman, no go habra en srefsrefi. Dosu fa yu e si a tan seybi yari langa di a no nyan, nyan a e nyan yu de. Ma dray baka go na oso. Te yu go, dan yu tagi yu bigisuma, taki yu feni na mira di den e kari wrokoman, na ati fu en. Adyuku dray. A ten di Adyuku teki fu waka go, a no a ten dati a teki. A waka kon ben waka langzaam, ma a waka go hesi. Bika a feni a mira di den e kari wrokoman, te a puru na ati fu en. A yuru di a go, en papa kari en taki: - Adyuku mi boi, yu doro? A taki: - Ya mi papa, mi doro. A taki: - Pe na mira di yu tya kon de, pe na ati fu en de? A taki: - Mi papa, mi tya en kon. A taki: - Pe a de? Kisi en gi mi. A taki: - Mi papa, wakti. Mi o kisi en gi yu. Di mi e go, so mi si, so mi si. Mi waka, so mi si, so mi si. Mi waka, so mi si, so mi si. A laste presi mi go miti wan bigi pori udu. A bigi te, yu no sa abra en srefi, a kren yu ben o kren abra en. Ne wan krabdagu kon tagi mi taki: na a Grandagwe di granmasra ben meki sweri nanga en fu en pranasi, taki hala yari a sa gi en dri nengre fu a nyan, fu a mara moro sukru leki den tra pranasi di de krosbey. Granmasra ben meki sweri anga en fu dri nengre, ma son yari a ben nyan twenti te a ben nyan twenti na feyfi, te a ben kaba ala nengre fu Suksesi. Ne yu si, den bigisuma kon pina en poti dyaso seybi yari kaba. We, efu mi kren na en tapu, a e go nyan mi, bika angri e kiri en. A papa taki: - Hay mi pikin, dan yu waka! We, yu sabi san na a krabdagu di yu si? A taki: - Nono. A taki: - We, a krabdagu dati na a mama fu a pranasi, a gronwinti fu en. A gronwinti fu en na Luangu. Na hen tyari yu. A taki: - We mi pikin, fa yu tagi mi de, dan yu waka ay. Ma luku, mi o gi yu wan koni. Ma yu sa ori yu brede. Yu brada yu no mu tagi. A taki: - Kwetkweti mi papa. A taki: - We luku, mi abi wan bigi drifutu patu. Dan te musudey mamanten, dan mi o tjari yu gowe go wasi. Ma te mi wasi yu tin dey langa, dan yu sa si sortu bun mi du yu. Ma di fu erfu dey, te yu go a firi, te basya gi yu wan marki, yu no mu wroko en. Yu mu koyri fu yu. So. A papa teki Adyuku, a tyari en go pe a obiagodo ben de, wasi Adyuku. Ma a tra brada a no wasi. A wasi en tin dey langa. Di fu erfu dey den go a firi. Basya marki wroko gi Adyuku. Adyuku teki en pipa, a e smoko fu en. Basya lontlontu ala sma wroko, a si en wroko, a taki: - Adyuku! A taki: - Ya basya? A taki: - Yu no e wroko? A taki: - Nono basya, mi no e wroko. A so Adyuku prey a sani a heri wiki, munde te doro satra. Satra bakadina basya kon na Adyuku, a taki: - Adyuku! A taki: - Ya basya? A taki: - We tamara mamanten.... Yu no wroko a heri wiki, yu no kan kisi lansun. Adyuku taki: - Mi no abi bisi. A taki: - We ma u o fon yu. Granmasra gi mi order fu fon yu. Adyuku aksi, a taki: - Basya, omeni tetey yu o naki mi? Basya taki: - We, u o naki yu wan ondro tetey. We, wan ondro tetey di yu e yere de, na tu ondro tetey. A dati ede tamalen di nengresuma, blaka suma, Afrikan lutu, e teki meki stroop e dringi, efu den abi frustan, den no sa dringi en. Bika den suma di ben abi pranasi, den tya tamalen komopo te a tra kondre kon prani dya. Nanga dati den ben e fon katibo, fon srafu, den ben e losi en. We, efu yu sabi dati, dan tamalen mu de yu trefu. Ya. We, a ten dati, te den tagi yu taki den o naki yu wan tetey, dan a tu tetey. Bika tu basya e de. Dan den e losi den tamalenwipi, dan den e brey en, dan den e broko batra, dan den tai den. Efu basya naki yu wan so a yu pipa, kaba brudu komopo, dan granmasra e lafu: - Basya, yu abi moi anu! Dùsu tu basya, te den tu naki yu tu tetey, dan a e teri fu wan. Dan basya tagi Adyuku, a taki: - We Adyuku, u e go naki yu wan ondro tetey. (Dati wani taki a kon tu ondro). Bika fosi ten yu ben e wroko, ma now yu kon lesi, yu kon vrijpostuku. Mi tya go taigi granmasra. Dùsu yu e go kisi seybi-uku pansboko. Adyuku taki: - Mi no abi trobi. Tu ondro tetey ... We basya, a prey yu o prey anga mi. Efi yu ben gi mi wan seybi ondro ete, dan a kan de a ben sa betbeti mi skin. Ma tu ondro ... Na soso yu e kon trobi mi skin basya. Basya luku Adyuku so duun. A hari rapport, a tya en go gi granmasra. Granmasra taki: - Hn! Takel na kel, a vrijpostek.

Na soso a e go dede, want a sa man teki seybi ondro tetey? Sonde kon. Fosi den go kari Adyuku, Adyuku fosi doro kaba. Adyuku taki: - Hodi mi granmasra! Nanga en pipa na en mofo. Granmasra no e piki. - Daki mi granmasra! Daki mi sisi! Daki mi bigi misi! Den e luku Adyuku so duun. Dan basya kon. Adyuku tanapu. Adyuku kren go. A yuru di Adyuku go, a taki: - Mi basya, mi e haksi yu ete wan tron, taki omen tetey yu o gi mi. Basya taki: - Tu ondro. A taki: - Basya, prey yu o prey anga mi. Mi denki a wan seybi ondro yu ben o gi mi. Dati a fu mi krasi mi skin srefsrefi. Dan granmasra tanapu anga en bigi pipa na barkon. A yuru di basya naki a wan tetey so ‘taw!’ a tra tetey fadon ‘tyaw!’, sisi bari: - Mi gado, mi baka! Bika a tetey di fadon na Adyuku skin, dan sisi firi en. A yuru di sisi dray so, luku so, a bigi yaki di a weri sidon a tapu a dyarususturu, a priti opo. Ala en baka priti opo. Adyuku bari gi basya, a taki: - Basya, kanti tetey gi mi. Dati mi abi fanowdu. Saka tetey gi mi! Basya kanti baka. Sisi flaw. Granmasra lon, a taki: - No naki moro! No naki moro! Sisi e dede! Adyuku dray, a taki: - Basya, saka tetey gi mi! Tetey mi mu abi! Dan basya ook no e ferstan a sani. Den bigin naki Adyuku bruyabruya tetey. Ala tetey di e fadon, granmasra bari te a lolo na a balkon. Ala pipa komopo na en mofo. Ala en mindri baka priti. Granmasra flaw, sisi flaw, pranasi trubu. Dan basya no sá san fu du. Den libi Adyuku. Adyuku e kari den taki: - U kon fon mi no? Basya srefi trowe ala tetey. Adyuku gowe fu en na oso. A yuru di a go, en papa aksi en taki: - Mi boy, fa a pasa? A taki: - We mi papa, noyti mi si so. A saka, a brasa en papa, a go a gotro, a go kisi fisi, a kon bori tonton gi en papa. Adyuku, a so a e waka na ini a pranasi. Ma now, yu ben abi wan man na ini Motkriki di abi wan pranasi den e kari Dagrâti. Den ben e kari en masra Müringen. Dan a yuru di granmasra kon betre, dan granmasra komopo anga en boto. Den tentiboto dati, a fositen den ben e kari den tenboto. Dan den e poti den srafu e lo. Na a tenboto u waka now: A Sinamari di e beni, Sinamari di e prodo, Sinamari-o. - A-e! A Sinamari di e beni, Sinamari di e prodo, Sinamari-o. - A-e! - Mi weri-o, mi weri-o. - Timan, timan, pa ... ruu!

A boto e lon go a Motkriki. Nanga dyentiwatra den e waka. A yuru di a masra fu Suksesi doro a Motkriki, a masra Müringen, a go, den sidon, den taki tori. A tagi en taki: - Luku, mi abi wan vent dape na ini mi pranasi, geen land te bezeilen anga a vent. A vent no wani wroko. Efi yu go fu fon a vent, ala den tetey, na mi skin a e fadon, na sisi skin a e fadon. Voor wan dri maanden geleden den fon a vent. Ala mi mindri baka priti, dati bijna mi dede srefi. Mi no sabi fa fu du anga a vent. Man, yu no kan gi mi wan raad, fa mi sa ruim a vent op? Müringen taki: - A wan lawlaw sani. Wel kijk, mi e go sori yu wan sani. Sonde mi e kon a yu. Mi e teki ala den tra mati fu mi. Dan u e poti den kel, meki den go puru kokronto. Dan u e sutu den trowe. A masra e kisi wan troostwoord. A dray en boto gowe baka. Den lon go na oso. A Sinamari di e beni, Sinamari di e prodo, Sinamari-o. - A-e! A sinamari di e beni, Sinamari di e prodo, Sinamari-o. - A-e! - Mi weri-o, mi weri-o. - Timan, timan, pa ... ruu!

A yuru di a doro oso, den botoman tay boto, a dyompo go na inisey. Sisi aksi en taki: - Granmasra fa a pasa? A taki: - Wel, mi go na mi mati Müringen na Dageraad na ini Motkriki. Dan dati gi mi wan troostwoord. U e go opruim a vent dalig! Ma a yuru di a taki so, dan sensi di a teki en boto e go, dan Adyuku sabi. Adyuku go na en papa. En papa taki: - We mi boy, yu sabi san o pasa? Granmasra e go na ini Motkriki, a masra Müringen. Ma arki. A o kari yu te sonde mamanten fu go puru kokronto. Dan den o sutu yu. Ma a no yu wanwan. Den o kari negyi fu unu. Dan den o sidon nanga den gon na bakra oso. A taki: - Go kari sowan yonkuman kon, kari sowan yonkuman kon. Bika na neygi fu unu den de, di den o kari. Dan den o seni un go puru kokronto. Ma yu na a fosiwan den o sutu. So Adyuku go kari hala den trawan. A papa tyari den go, a wasi den te a doro. Di a kaba wasi den, - satraneti na a laste wasi di a wasi den - deybroko fu sonde musudey mamanten feyfi yuru, wan sani leki arfu siksi so kon a siksi yuru tapu, granbasya doro na Adyuku oso. - Adyuku. - Ya basya? - Granmasra e kari yu. A go na den trawan oso. Adyuku, a waka go a fesisey. A so a karikari den, te den doro neygi. A yuru di den kon a fesisey, den seni Adyuku: - Yu e go na a bon disi, yu mu go puru kokronto. Yu e go na a disi, yu mu go puru kokronto. Bika den kokrontobon ben prani anga langa rij. A yuru di den bigin kren go a tapu a kokrontobon - un mu reken taki granmasra abi wraak a tapu Adyuku - a lay ala en tu dobluloop gon, a naki ‘kraw!’ Hn! A yuru di a skot komopo, presi fu Adyuku fadon a tapu a bon, Adyuku dray, a luku granmasra, a taki: - Granmasra, teki den kugru fu yu dya baka. Granmasra skreki te a gon komopo na en anu fadon. A Müringen di ben dya, a lay wasi gi a trawan. En gon puru watra. A so den sutu sote. Trawan gon e broko, trawan skot no e piki. Masra Müringen kon beyfi. A heri sopi di den ben poti fu dringi, den no man dringi en. A saka ini en tenboto, a gowe fu en a Motkriki. Dan den yonkuman anga Adyuku, den go a den oso. A yuru di masra Müringen go na en pranasi, na Dagrâti pranasi, dan Adyuku meki wan pikin faya na wan ipi so, a e poti wanwan pisi udu gi en. We a wanwan pisi udu di a e poti gi en, masra Müringen no man sribi. Fa yu si a faya e bron, na so en heri skin e bron. Ne a kon, a kon tagi a masra fu Suksesi taki: - Yu sabi san? Yu poti mi na ini wan sani ini. Yu tyari mi kon dya nanga den nengre fu Suksesi dya, dati heri neti mi no man sribi. Mi musu e waka lontu. Mi skin e faja, dati mi skin e bron, ala mi buba. Mi no dede ete, mi skin e bron. Ma mi sa libi a pranasi disi, mi sa gowe. Yu Woiski, yu kon poti mi, tyari mi kon na ini a verdoem dya, meki den nengre di yu abi dyaso, mi no dede ete, den e bronbron mi skin. Ne masra Müringen komopo ini Motkriki. A libi Dagrâti pranasi, a e kon a Parasey. Ne den nengre fu Suksesi, di a ben de mofoyari, a yuru di den prey den susa, ne den e bari: Yu e yere wan bari a Parasey - dyendyen. - Yu e yere wan bari a Parasey - dyendyen. Masra Müringen go na Para - dyendyen. - Yu e yere wan bari a Parasey - dyendyen.

We ne masra Müringen, a no man tan a Motkriki. Ne yu si, a feroysi kon bay pranasi a Paraliba. Na Suksesinengre lon masra Müringen komopo na opo Kotka. Bika a ben go fu go yepi en mati, masra Woiski, di ben abi Suksesi. We kondreman, dan un musu hori den tori disi na ede. Mi srefi no ben de a srafuten, ma san den bigisma fu mi kon tagi mi, a so den ben e du anga nengre a fositen. So a tori kon kaba.