Sa maistra e sa fillasta

Una borta ci fiat unu chi teniat una filla, e fiat viuru. Custu mandat sa filla a scola; sa maistra de custa pipia, chi si narat Peppina, fiat bagadia. Una dì sa maistra narat a Peppina: – «Nara a babbu tuu si mi bolit po sposa. Deu t’emu a stimai, a trattai beni, a portai a passillai sempri cun mei, aici iasta a zerriai mamma a mei, est tanti bellu custu nomini. No est berus? no ti scarescias de si du nai a babbu tuu». – «No», di narat Peppina. Sa pipia bandat a domu, e di narat a su babbu: – «Papà, sa maistra mia m’hat nau chi d’essi domandau si da boliat po sposa». – «Filla mia, tui ses troppu pittica, e no cumprendis. Basta; naraddi chi d’happu a sposai candu si spaccianta is buttinus mius de ferru». S’uncras Peppina portat sa risposta a sa maistra chi d’iat nau: – «Tui ghettanci sempri acqua a cussus buttinus, aici su ferru s’arruinat, subitu si spaccianta, e prestu si sposaus». Peppina dogna dì andat a ghettai acqua a is buttinus. Fait oi e fait cras, finamenti si funti spacciaus. Su babbu de Peppina mandat a nai a sa maistra chi is bottinus fianta spacciaus, e chi po cussu si deppianta sposai comenti d’iat promittiu. Sa maistra di mandat a nai chi sì, e si sposanta. Apusti de un annu iat tentu una filla, e de insandus no podia biri prus a Peppina. Una dì narat a su mariru: – «Peppina è troppu mala, no da pozzu prus soffriri, circa de da sperdi». E su mariru di arrispundit: – «Ma comenti deppu fai?» – «Depis fai aici: a issa naras chi da portas a spassiu, e arribbaus attesu, di ghettas s’aneddu cun sa scusa de circai s’aneddu, tui ti ndi benis, e a issa da lassas». Su mariru arrosciu de da intendi prus, una dì narat a Peppina: – «Bestirì chi ti portu a passillai». Issa totu presgiara si bestit, e ci bessinti; camminanta, camminanta, candu fianta attesu in campagna propriu, su babbu di ghettat s’aneddu; in su mentris chi Peppina circat s’aneddu, su babbu si ndi bandat, e issa candu s’est bista sola, cumenzat a prangi, a si disperai, ma no sciera ita fai. Si fait notti, e issa canzara de prangi, pigat su sonnu; bandanta is animalis ferozis e ci da pappanta.