Ico indyabuluba yakwatilo mukoshi uutali

Kale indyabuluba yakwete umukoshi uwipi kwati ni cipembele. Ubushiku bumo indyabuluba yakumenye umubiye cipembele, yalamweba aiti, “icaani shino nshiku ifyo cileumfwika ukulula!” Cipembele asumina ati, “cinecine kwena mwandi ifimanama nafifulisha, filenyantaule caani panshi. Nga twingalafika pamulu wa miti pena kuti twalyako ululembelya, ico cena nokuwama kuti cawama. Natuyeipusha umutemwishi wesu muntu nalimo kuti atwafwako.”

Awe baima bonse babili baya balefwayo muntu, basuka bamukumanya, bamweba no mulandu. Umuntu nao aasuka fye ati “mwa? Iyoo ico tacafishe. Mukese mailo akasuba pakati nkesemipela bonse babili umuti mukanwe, mukamona amolu yenu ne mikoshi yenu ikaleepa nganshi mukalefika na pamulu wa miti.”

Bwati buce, indyabuluba yeka eyailefika pa nshita baumfwenepo. Umuntu epakupele ndyabuluba umuti onse uo akwete. Nacine yati ishinwa fye umuti yamona amolu no mukoshi fyaleepa. Amona yalafika na pamulu wa miti, yalalya no lulembelya. Inshita yapite ikalamba elyo cipembele ebele kanshi umutu ambeepele fye, yafulwa nokufulwa.

Nanomba line icipyu cicili kuli cipembele, eico atiila nga amono muntu mumpanga, apo pene amupishha inkususu.