La Facce de Crapa

Na figlia de no villano pe beneficio de na fata deventa mogliere de re; ma, mostrannose sgrata a chi l’aveva fatto tanto bene, le fa deventare la facce de crapa. Pe la quale cosa, sprezzata da lo marito, receve mille male trattamiente; ma, ped opera de no buono viecchio, omeliatase recupera la primma facce e torna ’n grazia de lo marito. Scomputo Ciulla de contare lo cunto suio, che fu de zuccaro, Paola, a chi toccava de trasire a lo ballo, commenzaie a dicere: «Tutte li male che commette l’ommo hanno quarche colore: o de sdegno che provoca o de necessitate che spegne o de ammore che ceca o de furia che scapizza; ma la sgratetudene è chella che non have ragione, o fauza o vera, dove se pozza attaccare. E perzò è tanto pessemo sto vizio che secca la fontana de la meserecordia, stuta lo fuoco de l’ammore, chiude la strata a li beneficie e fa sguigliare ne la perzona male recanosciuta ’nzavuorrio e pentemiento, comme vederrite ne lo cunto che ve farraggio sentire. Aveva no villano dudece figlie, che l’una non poteva ’n cuollo l’autra, pocca ogn’anno la bona massara de Ceccuzza, la mamma, le faceva na squacquara, tanto che lo poverommo, pe campare ’noratamente la casa, ieva ogne matina a zappare a iornata, che non sapive dicere s’era chiù lo sodore che iettava ’n terra o le spotazze che metteva a la mano: vasta, ca co lo poco de le fatiche soie manteneva tanta cracace e peccenaglie, che non moressero de la famme. Ora, trovannose chisto no iuorno a zappare a lo pede de na montagna, spione de l’autre munte, che metteva la capo sopra le nugole pe vedere che se faceva ne l’aiero, dove era na grotta accossì futa e broca, che se metteva paura de trasirece lo Sole, scette da chella no lacertone verde quanto no coccotriglio, che lo povero villano restaie cossì sorriesseto che non appe forza de appalorciare e da n’aperta de vocca de chillo brutto anemale aspettava lo chiodemiento de li iuorne suoie. Ma, ’nzeccatose, lo lacertone le disse: «Non avere paura, ommo da bene mio, ca non songo ccà pe farete despiacere nesciuno, ma vengo sulo pe lo bene tuio». Chesto sentenno Masaniello, che cossì aveva nomme lo fatecatore, se le ’ngenocchiaie da ’nante, decennole: «Signora commo-te-chiamme, io sto ’m potere tuio: fallo da perzona da bene ed agge compasseione de sto povero fusto, c’have dudece regnole da campare». «Pe chesto», respose la lacerta, «io me so’ mossa ad aiutarete; perzò portame craie matino la chiù peccerella de le figlie toie, ca me la voglio crescere comme figlia e tenerela cara quanto la vita». Lo nigro patre, che sentette chesto, restaie chiù confuso de no mariuolo quanno l’è trovato lo furto ’n cuollo, pocca, sentennose cercare na figlia da lo lacertone e la chiù tennerella, facette consequenzeia ca non era senza pile lo manto e la voleva pe no pinolo aggregativo de vacovare la famma. E decette fra se stisso: «S’io le do sta figlia, le do l’arma mia; si ’nce la neo, se pigliarrà sto cuorpo; si ’nce la concedo, so’ spogliato de le bisciole; si la contradico, se zuca sto sango; si consento, me leva na parte de me medesemo; si recuso, se piglia lo tutto. Che me resorvo? che partito piglio? a che spediente m’attacco? oh, che mala iornata aggio fatta! che desgrazia m’è chioppeta da lo cielo!». Accossì dicenno, lo lacertone disse: «Resuorvete priesto e fà chello che t’aggio ditto; si no ’nce lasse le stracce, ca io cossì boglio e cossì sia fatto!». Masaniello, sentuto sto decreto né avenno a chi appellarese, iette a la casa tutto malenconeco, cossì gialliato de facce che pareva ’nsodarcato, e Ceccuzza, vedennolo cossì appagliaruto ascelluto annozzato e ’ngottato, le decette: «Che t’è socciesso, marito mio? haie fatto accostiune co quarcuno? t’è stato speduto quarche secutorio contra? o ’nc’è muorto l’aseno?». «Niente de chesto», respose Masaniello, «ma na lacerta cornuta m’ha puosto ’n’ moina, pocca m’have ammenacciato ca si no le porto la figliola nostra chiù peccerella farrà cose de chelle che feteno: che la capo me vota comme argatella, non saccio che pesce pigliare! da una parte me costregne Ammore, e da l’autra lo pesone de la casa! ammo scorporatamente Renzolla mia, ammo scorporatamente la vita mia: si no le do sta ionta de li rine mie, se piglia tutto lo ruotolo de sta ’mara perzona mia. Perzò consegliame, Ceccuzza mia, si no so’ fuso». Sentenno chesto la mogliere le disse: «Chi sa, marito mio, si sta lacerta sarrà a doie code pe la casa nostra? chi sa se sta lacerta è la certa fine de le miserie nostre? vi’ ca lo chiù de le vote ’nce dammo nuie stisse l’accetta a lo pede e quanno devarriamo avere la vista d’aquila a canoscere lo bene che ’nce corre avimmo l’appannatora all’uocchie e lo granco a le mano pe l’agranfare. Perzò và, portancella, ca lo core me parla ca sarrà quarche bona sciorta pe sta povera peccerella». Quatraro ste parole a Masaniello e la matina – subbeto che lo Sole co lo scupolo de li ragge iancheiaie lo cielo, ch’era annegruto pe l’ombre de la Notte – pigliaie la peccerella pe la mano e la portaie dov’era la grotta. Lo lacertone, che steva a la veletta quanno venesse lo villano, subbeto che lo scoperze scette fora da lo recuoncolo e, pigliatose la figliola, deze a lo patre no sacchetto de pataccune decennole: «Và, marita l’autre figlie co sti fellusse e stà allegramente, ca Renzolla ha trovato la mamma e lo patre. Oh viata essa, ch’è ’nmattuta a sta bona fortuna!». Masaniello tutto preiato rengraziaie la lacerta e se ne iette zompanno a la mogliere, contannole lo fatto e mostrannole li frisole, co li quale maritattero tutte l’autre figlie, restannole puro agresta pe gliottere co gusto li travaglie de la vita. Ma la lacerta, avuta c’appe Renzolla, facenno apparere no bellissemo palazzo ’nce la mese drinto, crescennola co tante sfuorge e riale all’uocchie de na regina. Fà cunto ca no le mancava lo latto de la formica, lo magnare era de conte, lo vestire de prencepe, aveva ciento zetelle sollecete e provecete che la servevano, co li quale buone trattamiente ’n quattro pizzeche se fece quanto na cercola. Occorze che, ienno a caccia lo re pe chille vosche, se le fece notte pe le mano, né sapenno dove dare de capo vedde lucere na cannela drinto a sto palazzo, pe la quale cosa mannaie a chella vota no servetore azzò pregasse lo patrone a darele recietto. Iuto lo servetore, se le fece ’nante la lacerta ’n forma de na bellissema giovane, che, sentuta la ’nmasciata, disse che fosse mille vote lo buono venuto, ca no ’nce sarria mancato pane e cortielle. Sentuto lo re la resposta, venne e fu recevuto da cavaliero, scennole ciento pagge ’nante co ’ntorce allommate, che pareva na granne assequia de n’ommo ricco; ciento autre pagge portaro le vevanne a tavola, che parevano tante guarzune de speziale che portassero li sauzarielle a li malate; ciento autre co strumente o stordemiente mosechiavano; ma sopra tutte Renzolla servette a dare a bevere a lo re co tanta grazia, che bevette chiù ammore che vino. Ma, scomputo lo mazzecatorio e levato le tavole, se iette lo re a corcare e Renzolla medesema le tiraie le cauzette da li piede e lo core da lo pietto, co tanto buon termene che lo re sentie da l’ossa pezzelle toccate da chella bella mano saglire lo venino ammoruso a ’nfettarele l’arma, tanto che, pe remmedeiare a la morte soia, procuraie d’avere l’orvietano de chelle bellezze e, chiamanno la fata che n’aveva protezione, ’nce la cercaie pe mogliere. La quale, non cercanno autro che lo bene de Renzolla, non sulo ’nce la dette liberamente, ma la dotaie ancora de sette cunte d’oro. Lo re, tutto giubiliante de sta ventura, se partette co Renzolla, la quale, spurceta e scanoscente a quanto le aveva fatto la fata, l’allicciaie co lo marito senza direle na parola mardetta de compremiento. E la maga, vedenno tanta sgratetutene, la mardisse, che le tornasse la faccie a semeletutene de na crapa e, ditto a pena ste parole, se le stese lo musso co no parmo de varva, se le strensero le masche, se le ’ndurzaie la pelle, se le ’mpelaie la faccie e le trezze a canestrelle tornaro corna appontute. La quale cosa visto lo nigro re, deventaie no pizzeco, né sapeva che cosa l’era socciesso, pocca na bellezza a doi sole s’era fatta accossì strasformata e, sospiranno e chiagnenno a tutto pasto, deceva: «Dove so’ le capille che m’annodecavano? dove l’uocchie che me sficcagliavano? dove la vocca che fu tagliola de st’arma, mastrillo de sti spirete e codavattolo de sto core? ma che? aggio da essere marito de na crapa ed acquistarene titolo de caperrone? aggio da esser’arredutto de sta foggia a fidareme a Foggia? non no, non voglio che sto core crepa pe na faccie de crapa, na crapa che me portarrà guerra cacann’aulive». Cossì decenno, arrivato che fu a lo palazzo suio, mese Renzolla co na cammarera drinto na cocina, danno a l’una e a l’autra na decina de lino azzò la filassero, mettennole termene de na semmana a fornire lo staglio. La cammarera, obedenno lo re, commenzaie a pettenare lo lino, a fare le corinole, a metterele a la conocchia, a torcere lo fuso, a fornire le matasse e a fatecare comme a cana, tanto che lo sapato a sera se trovaie scomputo lo staglio. Ma Renzolla, credennose d’essere la medesema ch’era a la casa de la fata, perché non s’era merata a lo schiecco, iettaie lo lino pe la fenestra, decenno: «Ha buon tiempo lo re a dareme sti ’mpacce! si vo’ cammise, che se n’accatte! e non se creda avereme ashiata a la lava, ma s’allecorde ca l’aggio portato sette cunte d’oro a la casa e ca le so’ mogliere e non vaiassa e me pare c’aggia de l’aseno a trattareme de sta manera». Co tutto chesto, comme fu lo sapato matino, vedenno ca la cammarera aveva filato tutta la parte soia de lo lino, appe gran paura de quarche cardata de lana e perzò, abbiatase a lo palazzo de la fata, le contaie la desgrazia soia. La quale, abbracciannola co grann’ammore, le dette no sacco chino de filato azzò lo desse a lo re, mostranno d’essere stata bona massara e femmena de casa. Ma Renzolla, pigliatose lo sacco senza dire a gran merzí de lo servizio, se ne iette a lo palazzo reiale, tanto che la fata tirava prete de lo male termene de sta ’nzamorata. Ma avuto lo re lo filato, deze dui cane, uno ad essa e uno a la cammarera, decenno che l’allevassero e crescessero. La cammarera crescette lo suio a mollichelle e lo trattava comm’a no figlio, ma Renzolla decenno: «Sto penziero me lassaie vavomo! lloco so’ date li turche? aggio da pettenare cane e portare cane a cacare?», e cossì decenno sbelanziae lo cane pe la finestra, che fu autro che sautare pe drinto lo chirchio. Ma, dapo’ cierte mise, lo re cercato li cane, e Renzolla, filanno male, corze de novo a la fata e, trovato a la porta no vecchiariello, ch’era portiero, le disse: «Chi sì tu e che addommanne?». E Renzolla, sentutose fare sta proposta de sbauzo, le disse: «Non me canusce, varva de crapa?». «A me co lo cortiello?» respose lo viecchio. «Lo mariuolo secuta lo sbirro! allargate ca me tigne, disse lo caudararo! iettate ’nnante pe non cadere! io varva de crapa? tu sì varva de crapa e mezza, ca pe la presenzione toia te mierete chesso e peo; ed aspetta no poco, sfacciata presentosa, ca mo te chiarisco e vedarraie dove t’have arredutto lo fummo e la pretennenzia toia». Cossì decenno corze drinto a no cammariello e, pigliato no schiecco, lo mese ’nnante a Renzolla, la quale, visto chella brutta caira pelosa, appe a crepantare de spasemo, che non tanto sentette abbasca Ranaudo mirannose drinto a lo scuto ’ncantato straformato da chillo ch’era, quant’essa pigliaie dolore vedennose cossì stravisata che non canosceva se stessa. A la quale decette lo viecchio: «Te dive allecordare, o Renzolla, ca sì figlia de no villano e che la fata t’aveva arredutto a termene che iere fatta regina, ma tu ’nzipeta, tu descortese e sgrata, avennole poco grazia de tante piacire, l’haie tenuta a la cammara de miezo, senza mostrarele no signo schitto d’ammore. Perzò piglia e spienne, scippane chesto e torna pe lo riesto! tu ne cauze buono de la costiune, vide che faccie ne puorte, vide a che termene sì arreddotta pe la sgratetutene toia, che pe la mardezzione de la fata haie non sulo mutato faccie, ma stato perzì. Ma, si vuoi fare a muodo de sta varva ianca, trase a trovare la fata, iettate a li piede suoie, sciccate sse zervole, rascagnate ssa faccie, pisate sso pietto e cercale perdonanza de lo male termene che l’haie mostrato, ca essa, ch’è de permone tenneriello, se moverrà a compasseione de le male sciagure toie». Renzolla, che se sentette toccare li taste e dare a lo chiovo, fece a bierzo de lo viecchio e la fata, abbracciannola e vasannola, la fece tornare a la forma de ’mprimma e, puostole no vestito carreco d’oro, drinto na carrozza spantosa accompagnata da na ’mmorra de serveture, la portaie a lo re. Lo quale, vedennola cossì bella e sforgiosa, la pigliaie a caro quanto la vita, dannose le punia ’m pietto de quanto strazio l’aveva fatto a patere e scusannose ca pe chella mardetta faccie de crapa l’aveva tenuta iusta li bene. Cossì Renzolla stette contenta, amanno lo marito, onoranno la fata, e mostrannose grata a lo viecchio, avenno canosciuto a propie spese ca iovaie sempre l’essere cortese».