La Preta de lo Gallo

LA PRETA DE LO GALLO

Mineco Aniello, pe virtù de na preta trovata ’n capo a no gallo, deventa giovane e ricco; ma, essennole truffata da dui nigromante, torna viecchio e pezzente e, cercanno lo munno, a lo Regno de li Surece ha nova de l’aniello ed, aiutato da dui surece, la recupera, torna a lo stato de ’mprimmo e se venneca de li mariuole. «Non sempre ride la mogliere de lo latro, chi tramma fraude se tesse roine; non c’è ’nganno che non se scopra, né trademiento che non venga a la luce; le mura so’ spiune de li forfante; latrocinio e pottanicio crepa la terra e dicelo, comme ve farraggio sentire, si starrite co l’arecchie a la casa.

Era na vota a la cettà de Grotta Negra no cierto Mineco Aniello, cossì ’n desditta de la desgrazia che tutto lo stabele e lo mobele suio sottasopra era no gallo patano, che se l’aveva cresciuto a mollichelle. Ma, trovatose na mattina allancato da l’appetito, perché la famme caccia lo lupo da lo vosco facette penziero de pigliarene li picciole. E, portatolo a lo mercato, trovaie dui varvaianne negromante, co li quale venuto a li patte e liberatolo pe meza patacca le decettero che l’avesse portato a la casa loro, ca l’averriano contato li sbruonzole.

E cossì, abbiatose li maghe e Minec’ Aniello retomano, sentette che parlavano ’n forbisco fra loro, decenno: «Chi ’nce l’avesse ditto de trovare sto buono ’matteto, o Iennarone? sto gallo senz’autro sarrà la ventura nostra, pe chella preta che tu sai c’have drinto la catarozzola, la quale farrimmo legare subeto a n’aniello, pe avere tutto chello che saperrimmo demannare». E Iennarone responnette: «Stà zitto, Iacovuccio, ca me veo ricco e manco lo creo, e non veo l’ora de scocozzare sto gallo pe dare no cauce ’n facce a la pezzentaria e stirareme la cauza, pocca a sto munno le virtù senza tornise so’ tenute pe pezza de pede e cossì comme vai cossì sì tenuto».

Mineco Aniello, ch’aveva curzo paise ed aveva magnato pane de chiù forna, sentuto lo zergo comme fu a no vicariello stritto votaie carena e truccaie pe la porverosa e, curzo a la casa, torze lo cuollo a lo gallo e, apertole la capo, trovaie la preta. La quale fatto subeto legare a n’aniello d’attone, volenno fare sperienza de la vertù soia disse: «Vorria deventare guagnone de decedotto anne!» e, ditto ste parole apena, lo sango le tornaie chiù vivo, li nierve chiù forte, le gamme chiù ferme, la carne chiù fresca, l’uocchie chiù speretuse, li capille d’argiento se fecero d’oro, la vocca, ch’era no casale sacchiato, se popolaie de diente, la varva, ch’era caccia reservata, deventaie terreno semmenatorio. ’Nsomma, fatto no bellissimo giovaniello, tornaie a dicere: «Io desiderarria no palazzo de sfuorgio e fare parentato co lo re!». E loco te vediste schiudere no palazzo de bellezza ’ncredibele, dov’erano statoe de spanto, colonne da stordire, petture de strasecolare: l’argiento sbombava, l’oro se scarpisava pe terra, le gioie te shiongavano ’n facce, li serveture vrellecavano, li cavalle e carrozze erano senza numero: ’nsomma fece tanta mostra de recchezza che lo re ’nce aperze l’uocchie ed appe da caro darele Natalizia, la figlia.

Tra chisto tiempo, scopierto li negromante la fortuna granne de Mineco Aniello, fecero penziero de levarele da mano sta bona sciorte e, fatto na bella pipata che sonava e ballava a forza de contrapise, vestennose da mercante iettero a trovare Pentella, la figlia de Mineco Aniello, co scusa de vennerencella. La quale, visto cossì bella cosa, le disse ’n che priezzo la tenevano, li quale resposero che non’nc’era denaro che l’avesse potuto pagare, ma ch’essa poteva esserene patrona co farele no piacere schitto, ch’era lassarele vedere la fattura de l’aniello che teneva lo patre, pe pigliarene lo modiello e farene n’autro simele, ca l’averriano donato la pipata senza pagamiento nesciuno.

Pentella, che ’ntese st’afferta e non aveva sentuto lo proverbio a buon mercato pensace, azzettaie subeto la partita, decenno che fossero tornate la matina appriesso ca se l’averria fatto prestare da lo patre. Iutosenne li maghe e venuto lo patre a la casa, tante cassesie le disse e tante vruoccole le fece che lo tiraie a prestarele l’aniello, trovannose scusa ca steva malanconeca e se voleva rallegrare no poco lo core. Ma, venuto lo iuorno sequente – quanno lo pagliamenuta de lo Sole fa scopare le lordizie dell’ombre pe le chiazze de lo cielo – vennero li maghe, che non cossì priesto avettero ’n mano loro l’aniello che squagliattero comm’a chillo che scria, che non se ne vedde fummo, che la negra Pentella appe a morire d’abbasca. Ma, arrivate li maghe a no vosco dove li ramme dell’arvole arcune facevano la ’mpertecata ed autre ioquavano a pane caudo fra loro, dissero a l’aniello c’avesse guastato tutta la ’menzione de lo viecchio rengiovenuto. Lo quale, trovatose a chillo tiempo ’nanze lo re, ’n ditto ’n fatto se vedde ’ngrifare e ianchiare li capille, ’ncrespare la fronte, ’nsetolire le ciglia, scarcagnare l’uocchie, arrepecchiare la facce, sdentare la vocca, ’mboscare la varva, auzare lo scartiello, tremmare le gamme e, sopra tutto, li vestite ’nshiammante tornare a vrenzole ed a pezzolle. Pe la quale cosa lo re, che vedde sto brutto pezzente seduto ’n commerzazione cod isso, lo fece subeto cacciare co mazze e male parole.

Lo quale, vedennose caduto ’n chiummo, iette chiagnenno a la figlia e, cercato l’aniello pe remmediare a sto desordene, sentette la burla fattale da li mercante fauzarie e mancai poco che non se derropasse pe na fenestra, iastemmanno mille vote la ’ngnoranza de la figlia, che pe na negra pipata l’aveva fatto restare comm’a no brutto paputo, pe na cosa fatta de pezze l’aveva arredutto a fare cose da pazzo, pocca era resoluto de ire tanto spierto e demierto, comm’a lo male denaro, fi’ che avesse nova de sti mercante.

Cossì decenno, puostose no capopurpo ’n cuollo, li calantrielle a li piede, na vertola a travierzo le spalle e na mazza ’n mano e, lassanno la figlia fredda e ielata, se pose pe desperato a camminare. E tanto vottaie li piede c’arrivaie a lo regno de Pertuso Cupo, abitato da surece, dove, pigliato pe spione de le gatte, fu portato subeto ’nanze a Rosecone, lo re. Da lo quale addemmannato chi era, da dove veneva e che iesse facenno da chille paise, Mineco Aniello, dato ’mprimma a lo re na cotena pe signo de tributo, le contaie ad una ad una tutte le desgrazie soie e concruse ca voleva conzomare tanto chillo nigro scuorzo fi’ che avesse nova de chelle arme dannate che l’avevano fatto priore de na gioia accossì cara, levannole a no stisso tiempo lo shiore de la gioventù, la fonte de la recchezza, la pontella de lo ’nore.

Rosecone, a ste parole, se sentette rosecare da la pietate e, desideruso de dare quarche consolazione a lo poverommo, chiammaie li surece chiù viecchie a conziglio, demannannole parere ’ntuorno a la desgrazia de Mineco Aniello e commannannole a fare delegenzia si se potesse avere quarche nova de sti mercante a posticcio. Fra li quale trovannose pe ventura Rudolo e Sautariello, surece pratteche de le cose de lo munno, li quale erano state una seina d’anne a na taverna de passo, dissero: «Stà de bona voglia, cammarata, ca le cose sarranno meglio che non te cride. Ora sacce che, trovannoce no iuorno drinto na cammara dell’Ostaria de lo Cuorno, dove alloggiano e sguazzano allegramente l’uommene chiù stimate a lo munno, da llà passaro duie de Castiello Rampino, li quale dapo’ magnare, avenno visto lo funno de l’arciulo, descorrevano de la burla fatta a no cierto viecchio de Grotta Negra, avennolo corrivato de na preta de gran vertute, la quale, disse uno de chille che se chiammava Iennarone, ca non se l’averria levata mai da lo dito, pe n’avere accasione de la perdere comm’aveva fatto la figlia de sto viecchio».

Sentenno sta cosa, Mineco Aniello disse a li dui surece che, si se confidavano d’accompagnarelo a lo paiese de sti mariuole e de farele recuperare l’aniello, l’averria dato na sarma de caso e de carne salata, che se l’avessero gauduta ’nzemmera co lo signore re. Li quale, trattannose d’ontare la mano, s’offerzero de fare mare e munte e, cercato lecienza a la sorecesca corona, partettero.

Ed, arrivate dapo’ luongo cammino a Castiello Rampino, li surece fecero fermare Minic’Aniello sotto certe arvole, a pede de no shiummo che, comm’a sangozuca se pigliava lo sango de li faticature e lo iettava a lo maro, ed isse, trovato la casa de li maghe, veddero che Iennarone non se levava mai l’aniello da lo dito; pe la quale cosa cercaro pe via de strataggemma guadagnare sta vettoria.

Ed, aspettato che la Notte tegnesse d’angresta la facce de lo cielo, ch’era cotta de Sole, comme se fu iuto luongo luongo a corcare commenzaie Rudolo a rosecare lo dito de l’aniello. Lo quale sentennose fare male se lo levaie, posannolo ’ncoppa a na tavola a capo lo lietto. La quale cosa visto, Sautariello se lo pose ’mocca e ’n quatto zumpe foro a trovare Mineco Aniello.

Lo quale co chiù allegrezza che non ha lo ’mpiso quanno l’arriva la grazia, fece subeto deventare dui asene li nigromante, sopra l’uno de li quale stiso lo ferraiuolo se accravaccaie comm’a no bello conte e, carrecato l’autro de lardo e caso, toccaie a la vota de Pertuso Futo, dove, regalato lo re e li conzigliere, le rengraziaie de quanto bene pe causa loro aveva recevuto, preganno lo cielo che maie mastrillo le facesse ’mpedimiento, maie gatta le portasse dammaggio, maie arzeneco le causasse despiacere.

E, partutose da chillo paese ed arrivato a Grotta Negra, tornato chiù bello de ’mprimma fo recevuto da lo re e da la figlia co li maggiure carizze de lo munno e, fatto derropare l’asene da na montagna, se gaudette co la mogliere, non partennose maie l’aniello da lo dito, pe non fare quarch’autro scassone, che

cane ch’è scottato d’acqua cauda

ha paura perzì de l’acqua fredda».