Anansi na Angriten

Na ini a kondre pe Anansi ben e libi, wan bigi angri ben broko, bikasi bigi watra ben kon. Baka dati tranga drei ben kon. So ala nyanyan kon pori na gron. Ksaba nanga ptata pori. Ala banabon ben fadon. Nyanyan no ben de.

A ben de so lek' fa a ben de na ini a ten fu Yosef. Egipte ben abi nyanyan, ma den tra kondre no ben abi. Dan den sma ben go bai nyanyan na Egipte. A tori dati fu Yosef de na ini Bijbel fu leisi.

Na ini a anansitori disi, a kownu ben abi wan hebi nen. A no ben gridi. Ma a ben abi wan tra sani. A taki: "Ala sma di wani kon wroko, kan kon teki nyanyan. Den kan kon teki ksaba, den kan kon piki ptata. Den kan kon kapu bana. Ma fosi den gwe den mu taigi mi fa mi nen. Efu yu no sabi a nen, yu mu libi ala den sani di yu puru na ini a gron."

Anansi kari Akuba. A taki: "Yere, mi o go na a kondre fu yere a kownu nen. Ma yu mu yepi mi. Yu e weri wan pisduku gi mi. Dan yu e poti wan pikin batra papa na mi sei na ini wan baskita pe mi o didon. A krosi mu furu so dati a kownu no kan si fa mi bigi. Yu ferstan? Dan yu e teki yu bigi baskita, poti someni nyanyan leki yu kan tyari. Efu yu no man tyari en, yu e srepi en kon. Mi sa yepi yu bakaten. Dan mi e go pruberi fu yere fa a kownu nen."

Akuba taki: "A bun."

Tamara mamanten fruku, fosi son opo, en nanga Anansi go na pasi. Anansi ben waka nanga a pikin baskita. Ma di den kon krosbei fu a kondre, Akuba weri a pisduku gi en, poti en na ini a pikin baskita, tyari en go.

A taki: "Mi kownu, mi kon begi yu, mi no kan puru wan pikin nyanyan na yu gron?"

Kownu taki: "Ai, mi gudu, yu kan kon. Ma prakseri bun. Efu yu no sabi mi nen, yu mu libi ala a nyanyan di yu puru."

Akuba taki: "Mi sabi dati, mi kownu. Mi sa rai. Kande mi kan feni en." Akuba taki moro fara: "Mi kownu, mi abi wan pikin boi dyaso. Na pikin boi disi, mi no abi no wan sma fu luku en. A abi wan neigi mun so. Mi no kan libi en wanwan na oso. Mi no abi no wan sma. Mi e begi yu, mi kownu, mi kan poti en na wan sei dyaso? Mi e poti wan batra papa gi en. Efu a e kreikrei, yu kan gi en. Dan a sa tan tiri."

Brekten yuru, Anansi bigin kreikrei kreikrei. Kownu gi en a papa.

Ma Akuba e piki nyanyan. Tra sma yepi en, yepi en, yepi en te bakadina. Son bigin saka. Dan a doro baka na kownu oso.

Di Anansi kba nyan a papa, a kleine wan bigi kleine. A heri pisduku di a weri nati petepete. Dan a opo en sten, a bigin bari.

Te wan baby nati, yu mu weri wan tra krin pisduku gi en. Kownu no ben sabi den sani dati. A no ben abi pasensi tu. A taki: "San yu e bari so dan?"

Kownu go luku ini a baskita. A taki: "San e miti mi, Kongodifa? Wan pikin boi fu wantu mun, fa a kan kleine so wan bigi kleine? Pe ala a watra kmopo? A no kan de na ini en bere wawan! Ai, mi Kongodifa, san e miti mi tide?" So Anansi kon yere a nen.

Di Akuba kon baka nanga a baskita, Kownu taki: "A boi meki babari, yèrè."

A mama taki: "Ai, mi kownu. Tye, a boi stowtu, no?"

Kownu taki: "A ben switi ma a plasje. A kleine wan kleine dyaso gi mi. Mi no sabi san mi ben mu du. Mi no fasi en, yèrè. Mi no fasi en."

Akuba taki: "Mi kownu, mi sa tyari en gwe, bika mi no tyari noti kon fu weri gi en. Mi o opo en so nanga a watra."

Kownu taki: "Iya, ma yu no kan teki a baskita nanga a nyanyan. Yu mu taigi mi fosi fa mi nen."

A taki: "Kownu, na wan hebi nen?"

Kownu taki: "Mi no sabi."

"Na wan makriki nen? Nanga sortu letter a nen e bigin?"

Kownu taki: "Nono, dati mi no kan taigi yu."

Akuba taki: "We, mi e bigin rai. Kownu no sa nen Anansi, bika mi masra nen Anansi."

Kownu taki: "Na wan lawlaw nen. No, mi no nen so."

"Kownu, yu nen Wan?"

Kownu lafu.

"Yu nen Weri? Yu nen Kwaku? Yu nen Kofi?..." Akuba taki: "Kownu, wan leisi mi yere wan anansitori, wan tori wan sma ben ferteri. Na ini a tori dati, a kownu ben nen..."

Kownu taki: "Ai, kari kon."

"A kownu ben nen Kownu Kongodifa."

Kownu taki: "San! Fa yu du sabi a nen? Na mi nen dati. Iya, Kongodifa."

Akuba taki: "Ai, Kongodifa, na so Kownu nen." Bikasi Anansi ben taigi en safri na en yesi di a kon: "Kongodifa." Akuba ben yere en fu Anansi.

Kownu taki: "We, a bun. Yu rai bun. Ma yu no mu ferteri no wan enkri tra sma. Dan yu kan go na oso nanga yu baskita nanga yu nyanyan. Wan tra dei, yu kan kon teki baka, ma yu no mu tyari a boi disi kon moro."

Di den doro baka a uku, den kenki. Anansi teki a hebi baskita nanga nyanyan. Den lafu sote.

Pikinso moro dan Anansi ben abi nyanyan gi wan heri mun. So langa angriten ben de, Akuba ben kan go teki nyanyan na Kownu Kongodifa gron. Anansi yepi puru ensrefi na ini problema.

Anansi mu de!