Is tres stupidas

Una borta ci fiat una viura, e teniat tres fillas. Una de custas piccioccas si castiat cun d’unu giovunu, ma però no si fianta mai chistionaus. Duncas custu giovunu s’est dezidiu de da domandai, e d’hat mandau a nai a issa chi s’uncras deppiat andai a da domandai. Sa mamma de issas hat nau: – «Labai, piccioccas, si avvertu una cosa, de no fueddai nisciuna de bosatrus candu beni custu giovunu». – «No, no», arrispundint is fillas. Sa mamma hat nau: – «Si s’intendi fueddai, si lassa cun mali e cun treulu, e non ci torrat». Eccu s’uncras benit, du fainti intrai, e si sezzinti totus; sa mamma cun su giovunu chistionat, e is tres fillas ascurtanta. Sa prus manna cumenzat a nai: – «Bruddi m’ambruddi»; arrispundit sa sigunda: – «Missa la trudda»; sa prus pittica: – «A naru mamma a no nari nudda». Pigat su sposu, si ndi pesat e narat: – «Ba, ba, teneisì a contu, no seis genti chi feis cun mei». Si ndi bandat, e no ci torrat prus. Sa mamma inchietta ha certau is fillas, ma issu andau fiat, e andau est atturau.