Folk Tale

Is dus goppais

AuthorFrancesco Mango
LanguageSardinian
OriginItaly

Una borta ci fiat dus goppais, e si bolianta mera beni. Una dì unu de custus bandat a visitai a s’atru; custu ci teniat sa pingiara senza de fogu, cioè d’iat postu asutta de s’arreggiola, e su goppai d’hat nau: – «Comenti, Giuanni (chi si narat aici su meri de sa domu), sa pingiara buddi senza de fogu?» Arrispundit Giuanni: – «Si da bolit comprai, mi costa centu scurus». Da comprat, e da portat a domu, e di narat a sa mulleri: – «Ponidda chi buddit senza de fogu». Comprat sa pezza, ci da ghettat, da ponit asua de un arreggiola e da lassat. Candu est begnu su mariru a domu, hat agattau sa pezza crua, e s’est inchiettau cun sa mulleri, puita chi iat guastau sa pingiara. Subitu bandat aund’est goppai Giuanni, inchiettu chi d’iat pigau centu scurus e chi no fiat berus. E Giuanni d’hat nau: – «Tenga passenzia, imoi sa pingiara sa mulleri d’hat guastara». Insandus d’hat nau: – «Goppai, bolit comprai unu cunillu? bandat a fai sa spesa». E cuddu d’hat nau: – «Cantu indi bolit?» – «Centu scurus», arrispundit Giuanni. E si du comprat, bandat a domu, e di narat a sa mulleri chi du mandessit a fai sa spesa, puita chi ge fiat bonu. S’uncras a mengianu sa mulleri di ponit unu muccadori accappiau a su zugu, e ind unu cabiru ci di accappiat su dinai, e du mandat. Beni su mariru a domu po prandi, e non ci agattat nienti. – «E su cunillu?» domandat a sa mulleri. – «No d’happu bistu prus. D’happu mandau a fai sa spesa, e no c’è torrau». Torrat andai aund’est goppai Giuanni, inchiettu, e incontrat a Giuanni certendi cun sa mulleri; totu ind una borta da pungit, e sa mulleri arruit a terra morta. Indi bogat unu tamburinu, e unu sulìtu, e cumenzat a sonai; comenti fiat sonendi, eccu chi torrat bia. – «Goppai Giuanni», di narat cuddu, «mi du bendeis? aici candu bollu fai biri chi da bocciu a mulleri mia, da pungiu, insandus sonu su tamburinu e su sulìtu, e torrat bia». Pigat goppai Giuanni e si du bendit, e du portat a domu. Una dì pigat certu cun sa mulleri e da pungit, e cudda arruit in terra morta; pigat su tamburinu e su sulìtu, sonat; ma issa no si ndi pesat, ita sind’iat a pesai, chi fiat morta diaderu? Issu po su dispresgeri si nc’est sciusciau a funtana.


Text view