La Ciaulidda

Si cunta ca 'na vota c'era un patruni, e avia 'na ciaulidda. Chista sirvía lu patruni, e ci facía nsoccu vulía. Mentri niscía lu patruni, idda si ni jia 'ntra un jardinu di n'àutru chi stava 'n facci di la sò casa. Ddà c'era un pedi di ficu e si li jia a mangiari. Idda avía la fataciumi, e ogni vota chi niscía lu patruni si cutulava li pinni e addivintava signurina. Comu si spiddía di mangiari li ficu di lu jardinu, scinnía, e si ni jia ni lu sò patruni cu li pinni misi, e lu sicutava a sèrviri. Lu patruni la chiamava: — «Ciaulidda, ciaulidda, veni ccà nni lu patruni!» Idda ci jia supra lu dinocchiu. Lu patruni ci facía carizzii, e si nni prijava. Comu niscía lu patruni, idda a lu solitu si cutulava li pinni e si jia a mangiari li ficu. Mentri chi idda nun c'era, 'na vota s'asciò a viniri lu patruni, e truvau li pinni supra la seggia. Iddu, lu patruni, chiamava e nun ci rispunnía nuddu. Comu vitti chissa cosa, iddu ardíu li pinni tutti. Poi vinni idda vistuta di signurina, e 'n vidennu chi nun truvau li pinni, 'mpatiddíu. Lu patruni vidennu chissu ci dissi: —«Ah! tu si' la ciaulidda!?» e arristau alluccutu. Poi ci dissi: — «Giacchì tu si' la ciaulidda, iu ti vogghiu pigghiari pri mugghieri.» Allura si spidderu li capituli, e si spusaru facennu un bonu trattamentu.

Favula ditta, favula scritta,

Diciti la vostra, ca la mia è ditta.

Polizzi-Generosa.