Iuuencus, Leo et Praedator

Super iuuencum stabat deiectum leo. praedator interuenit, partem postulans. 'Darem' inquit 'nisi soleres per te sumere'; et improbum reiecit. forte innoxius uiator est deductus in eundem locum, feroque uiso rettulit retro pedem. cui placidus ille 'Non est quod timeas' ait, 'et quae debetur pars tuae modestiae audacter tolle'. tunc diuiso tergore siluas petiuit, homini ut accessum daret. Exemplum egregium prorsus et laudabile; uerum est auiditas diues et pauper pudor.