Folk Tale
Musca et Mula
Author | Phaedrus |
---|---|
Book Title | Fabulae Aesopiae |
Publication Date | 41 |
Language | Latin |
Origin | Italy |
Musca in temone sedit et mulam increpans "Quam tarde es" inquit "non uis citius progredi? Vide ne dolone collum conpungam tibi." Respondit illa: "Verbis non moueor tuis; sed istum timeo sella qui prima sedens cursum flagello temperat lento meum, et ora frenis continet spumantibus. quapropter aufer friuolam insolentiam; nam et ubi tricandum et ubi sit currendum scio." Hoc derideri fabula merito potest qui sine uirtute uanas exercet minas.
Text view • Book