Ranae Metuentes Proelia Taurorum

Humiles laborant ubi potentes dissident. Rana e palude pugnam taurorum intuens, 'Heu, quanta nobis instat pernicies' ait. interrogata ab alia cur hoc diceret, de principatu cum illi certarent gregis longeque ab ipsis degerent uitam boues, 'Sit statio separata ac diuersum genus; expulsus regno nemoris qui profugerit, paludis in secreta ueniet latibula, et proculcatas obteret duro pede. Ita caput ad nostrum furor illorum pertinet'.