*Den vledermuus ende die aren

Die beesten hadden groten strijt Jeghen die vogle op een tijt. Die vledermuus hilt metten beesten, Als metten stercsten ende metten meesten. (Si ontsach haer ende si dochte Dat si daer seker wesen mochte.) Doe quam mijn here die aren Met siere groter cracht ghevaren. Hi hadde die gracie ent gheval Dat hi verwan die beesten al. Doe quamen alle die vogle gemene Op die vledermuus allene Ende traken haer die plumen uut. Doe moeste si vlieghen bloter huut Bi nachte algader, niet bi daghe, Om dat si liet hare selfs maghe.

Dus es hi over al ghehaet Met rechte, die de sine laet.