Folk Tale

D’une Lisse qui vuleit chaaler

AuthorMarie de France
Book TitleYsopet
Publication Date1200
LanguageOld French
OriginFrance

D ‘une Leisse vus veil cunter Qui preste esteit à chaéler ; Mès ne sot ù gésir el deust, E ù ses Chaiaus aveir peust. A une autre Lisse requist Ken sun ostisel la sufrist Tant k’ele éust chaellei , Mult l’en sareit, ce dist, bon grei; Tant l’en ad requise è proiée, Ke od li l’ad dunc herbregiée Puiz kant ot éu ses chéiauz E espeudriz les ot è biauz , Cele à kui li ostiex esteit Suvent par ax demage aveit, De sa maisun les rueve issir Ne les vuleit mes cunsentir. L’autre se prist à démenter , E dist quel ne seit ù aler ; Yvers esteit pur la freidur Murreit de freit à grant dolur ; Dune li requist par caritéi Q’el herbrejast jusqu’en estéi, E cel ot de li grant pitié Otréia li par amistié . Qant le bel tens vit revenir Adunc les rueve forz issir. L’autre cumença à jurer Que se jamès l’en ot parler, Que si Chaiel la détrairunt È forz de l’uis . l’a bouterunt; La force est lor en la maisun, Fors l’en unt mise sanz raisun.

Moralité

Cest essemple poez savoir, E par meint Preudomes vooir, Ke par bunté de sun curage Est chaciez de sun hiretage ; Ki felun Hume od li aquieut Ne s’en ist mie qant il vient.


Text viewBook