trans-8633

Die wuwe dwanc die duven sere; Doe ginghen si soeken I andren here. Den havec baden si, dat hi soude Hem ontfaen in sine houde, Te wachtene ende te achterwerne. Die havec sprac, hi deet gherne. Als hise hadde in siere warde, Daer en was noit I die hi sparde, Hine dede hem allen pijnlijchede Meer dan die wuwe te voren dede. Doe seide daer I: ‘wi sijns wel waert, Dat wi varen hinderwaert. Dese havec es ons vele wreder Dan die wuwe, ende doet ons leder.’ Dus siet men, dat die ghene varen, Die emmer nieu heerscap garen.