Folk Tale

*Den hont ende die lammekijn

Book TitleEsopet
Publication Date1300
LanguageMiddle Dutch
OriginNetherlands

Een hont sach wilen onder geeten I lammekijn lopen ende bleeten. Die hont seide toten lammekine: ‘Dine bestaet niet hier te sine, Volch diere moeder, die di vliet, Si es metten scapen, sine es hier niet.’ - ‘Ic soeker niet,’ sprac dlam, ‘Si es dicke te miwert gram, Die mi IX maende droech. Ic hebbe hier bat mijn ghevoech Van deser geet, die bi mi staet: An hare es al mijn toeverlaet; Jeghen mi en spaert si niet I twint, Si voet mi als haers selfs kint.’ - ‘Nochtan,’ seit hi, ‘es si di naer, Die di droech.’ Dlam seide: ‘hets waer, Als in dien dat si mi wan; Maer daer es I ander redene an: Si vliet mi, die soude broeden Bi naturen ende voeden, Ende dese, die mi niet en bestaet, Geeft mi troest, helpe ende raet, Ende voet mi met hare spise: Soe eest recht dat icse prise.’ Dus mach I meer goets bejaghen An vremde liede, dan an maghen.


Text viewBook