*Die hert ende den wolf

Die hert quam metten wolf ghegaen Daer hi vele scaep sach staen. Van ghenen scapen bat hi enen, Dat hi hem terwe soude lenen. Des boet hi hem den wolf te borghe. Tscaep hadde van den wolve sorghe Te wedersegghene dese dinc; Maer doe die wolf wech ginc, Sprac tscaep aldus toten herte: ‘Ic kenne wel,’ seit hi, ‘dijn herte: Ten iersten, dat die dach sal comen Van geldene, die ghi hebt ghenomen, Du loeps metten herten int wout; Wien heischic dan mine scout? Dijn borghe es valsch ende quaet, Dune best oec niet sonder baraet.’ Die vele beslaen ende luttel sorghen, Soeken gherne valsche borghen; Maer die es I vroet man, Diere hem voren wachten can.