*Die vlieghe ende I caluwen man

Die vlieghe beet I caluwen man Opt hoeft, die geen haer hadde an. Hi gaf hem selven slaghe groet Om die vlieghe te slane doet. Hi sloech te sticken sine kaken; Hine conste die vlieghe niet gheraken. Die vlieghe dede hem herde seer Ende si beten soe lanc soe meer. Als hi achter die vlieghe sloech Ende missede, die vlieghe loech. Doe seide die caluwe man ter vlieghen: ‘Du doest mijn hant dicke na di vlieghen; Al bestu hier dus menech werven Ontgaen, nochtan moesture om sterven; Du lachges, alsic placte mi, Du salt sterven, gherakic di.’ Die vele pijnlijcheden maket, Int ende wert hi gheraket. Soe langhe stuuct men ende steect Den stoep te watre, dat hi breect.