Folk Tale

*I hert ende den honden

Book TitleEsopet
Publication Date1300
LanguageMiddle Dutch
OriginNetherlands

Een hert quam drinken tere riviere. Hi sach sijn horne, die hi diere Prijsde, maer sine beene Versprac hi, om dat si waren clene. Mettien quam daer I man met honden, Die den hert daer staende vonden. Sine beene waren soe snel, Dat hi ontliep den honden wel Al dore I velt in I foreest, Daer bome ende telgre waren meest. Daer bleef hi vaste met sinen horen. ‘Ay mi!’ seegt hi, ‘ic ben verloren. Nu sie ic wel, al eest te spade, Ic lachterde tgoede, ic prijsde tquade.’ Aldus es menech man vernest. Die tgoede laet ende tquade mest. Hi mochte winnen daer hi verliest, Core hi tgoede daer hi tquade kiest.


Text viewBook