Donokɔrɔnin ani namakɔrɔba

Don dɔ, kɔngɔ digira donokɔrɔnin na. Donokɔrɔnin wulila. A bɛ taa a sennayaala walasa a ye dumuni sɔrɔ... Namakɔrɔnin fana wulila. A bɛ taa a sennayaala waasa a ye dumuni sɔrɔ. U fila taara ka ɲɔgɔn ye. U ye dantigɛ bɔ ɲɔgɔn ye.

Namakɔrɔ ko: «A ! donokɔrɔnin, e ye somaa ye, ne ye kungomaa ye, kɔngɔ digi’n bɛ ne la. A dɔ rɔ, e darakako ɲana dɛ ! Ne bɛ sin k’i kɛ n ka daraka ye».

Donokɔrɔnin ko: «Hun ! I ma ne sɔrɔ ban dɛ!»

Namakɔrɔnin ye donokɔrɔnin gɛn. Donokɔrɔnin bolila ko namakɔrɔ bɛ donokɔrɔnin sɔrɔ yɔrɔ min na, donokɔrɔnin y’i pan k’i sigi jiri san na. Namakɔrɔ kɔnɔganna...

Namakɔrɔ ko: «A! Donokɔrɔnin! K’i tɛ jigin, k’i fa salen».

A ko: «A! Ne fa maa sa, ne terikɛ bɛ yen, ne na n jigi don o la».

Namakɔrɔ ko: «A ! i tɛ jigin ? I fa salen, i fa terikɛ salen».

A ko: «A ! Ne ba bɛ yen, ne na n jigi don o la».

Namakɔrɔ ko: «I ba salen!»

«Ɛɛ! ne ba teri bɛ yen. Ne na n jigi don o la».

Namakɔrɔ ko: «A! dononkɔrɔnin ! i ba sara, i ba terimuso fana sara. I tɛ jigin?»

A ko: «Ne kɔrɔkɛ bɛ yen, ne na n jigi don o la».

Namakɔrɔ ko: «Donokɔrɔnin, i kɔrɔkɛ sara dɛ ! k’i tɛ jigin?»

A ko: «Ne kɔrɔkɛ terikɛ bɛ yen. Ne na n jigin don o la».

Namakɔrɔ ko: «A! I kɔrɔkɛ terikɛ sara dɛ!»

A ko: «Ne babɔso mɔgɔw bɛ yen, ne na n jigi don olu la».

«Ɛ! ko: donokɔrɔnin, a fɔra ne ye sisanni na ko: e babɔso cilen! Mɔgɔ si tɛ yen i bɛɛnna bilen».

Donokɔrɔnin ko: «Nin tɛ baasima ye».

Donokɔrɔnin y’i cun dugu ma.

A ko: «Namakɔrɔ, n dun sa! E maa min maa kɛ diɲɛ na, jigi t’e la : i fa jigi tɛ yen, i ba jigi tɛ yen, bɛɛnnaso tɛ i fɛ. A ! E bɛ kɛ mun ye diɲɛ na ? O tuma, ne bɛ diɲɛ to sa, e ka ne dun sa, ne ka taa Ala bara. Ne jigi na kɛ Ala ye yen».

Namakɔrɔ ye san filɛ ka dugu filɛ.

A ko: «A! E mɔgɔ o mɔgɔ, jigi tɛ maa min na, n’e y’o dun, a ! e niyɔrɔ fana tɛ Ala bara».

Namakɔrɔ siranna Ala ɲɛ, a ye donokɔrɔnin to yen.

Nin ye n ka nsiirin sabanan ye.

Pierre Jara, ka bɔ Torokɔrɔbugu

(Namakɔrɔ kɛra Ala dɔnbaa ye. Hali bi o dɔnbaa tɔ kelen kelenw, olu bɛ diɲɛ na. Olu mana mɔgɔ ɲumanw ye, u b’olu don sira kan, u mana mɔgɔ juguw ye, u b’olu don sira la.)