Folk Tale

Ngila l'Ulu

AuthorE. A. Ruskin
Book TitleMongo Proverbs and Fables
Publication Date0
ATU60
LanguageMongo
OriginDemocratic Republic of Congo

Ngila aokela Ulu, "Ulu, yaka yombale ekami; tofonyake elaka."

Ulu aolimeza ; ko nda mbile ek'iy'osisanaka aocwa lifaya eka Ngila. Ngila aolambela Ulu elambo e'enene mongo, ko baaji ba Ngila baolamb'efambe beuke mongo. Nyama la nse ya bilenge la bilenge, la toko, la mponga, la njunda la liwa, l'osaka, l'akondo, la moma; toma t'esengo touma.

Nk'akit'Ulu, Ngila aolosambela l'osambelo mongo. Nd'afeka aolokela, " Ulu, tosing'ol'elambo ; we cukala nd'ebonga ene e'aliko eki'm'okelezaka." Aolocumya ebonga ea lisangi mongo, la tokelengwa ta mbaunda. Ulu aoala, ko ntok'olotsi, ebonga ea ntale-ntale, ko Ulu afe'aliko, ntaundaka. Aomeka lounda, meka, meka, meka ; ntaonga. Wengi bomeka, ayokwa, ko jonge likae jofitana la wucu l'amoci. Nd'afeka aoleniwa bolemo mongo, aokela Ngila, " Cikala, we l'elambo eke ! Emi njocwa nd'ola. Bets'efe, kela oy'ekami."

Ngila aolocukya bets'efe, beko beoleka ; ko aocwa eka Ulu. Ulu aoloekola o la ndelemoza, aolosambela; akela, " Oya? Oya? Baaji'akami, loyaka nk'iny'auma, lolambela lilongo likami, Ngila, elambo."

Teketeke, ko balambo baosila, elambo eolelama. Ulu aoleta iokongo j'asi, ko baoyela, boka. Akela, " Ngila, osing'ol'elambo ekami, song'akata — mpange ole toma I'akata'ako ba yo. Ndanga wae bakata'ake bayale fe, soto, ng'akata ba liyenge."

Ngila aolimeza; ko aanga losong'akata'akande. Songa, songa, songa, ntaonga; bakata'akande o yo ngoki joso.

Ulu aolokela, " We bonto ow'obe mongo nsosolo ; bakata 'akawe yo mongo ! Ofongola befambe'ekami I'akata yo ngoko!" Lim'ako Ngila aolemwa bolemo mongo — aolea bakata'akae batacwaka fe ngole bakata ba liyenge ; nzakomba ekae okaaki bakata ba yo, ambene asola, asola o mpampa, bafaocikwana.

Ulu akela, "A! w'ontungyak'emi; aeyoko njokotungya we : tocinda mpenje."

Baengana bakata; omo akela webi, "Siki we ole mpaka e'onto;" ko onkina akela, "Ko we ngoko, ole bonto mongo."

Nd'afeka baolamb'elambo eka Ngila, ko bafaya bandetamaki bacukalaki nda totoko, bokak'olotsi : koko em'elambo eka Ulu, ko eko eongaki ; ko lim'ako baokend'oseka.


Text view