Icisimikisyo cakwe Kalama

Popele Kalama wa mfumu wa lu ku letele'mfumu. Na mailo ka fise'finani, ati: Ka pokeni Kalama aŵe. Ka isa uyo Kalama, ka injila mu ŋanda ya mfumu, ne ŵantu aŵenji ka ŵa loŋganina, ne finani ka ŵaŵila, ka ŵaŵila aŵakulu ŵonse. Popele akánice ne ku ka tana. Akánice ne ku fuma ne kú ya kuli nyina. Kumfwa ati: Mbati Ŵakalama ifi ŵa lu ku ntana-po ifinani, mama? Na mailo ka fise' finani mu bwalo'ŵo, ne kwa ku ŵeta Ŵakalama. Kaŵili ne kwisa akánice ako mu kwikala uko ŵalu kwaŵe'finani. Aŵe aŵe aŵe uku pela aŵantu, kaŵili ne ku ka tana ako kánice. Kaŵili akánice ne ku fumamo minwe lukoso, ŵa ka tana. Ne kú ya kuli ŵanyina ati: Mbati Ŵakalama, nindo ŵa lu ku ntanina, mama? Kumfwa ŵanyina ati: Kani kakwasu! Kumfwa ati: Kambi kasuŵa ŋka ŵa fumba-po.

Cine kambi kasuŵa ka fise'finani; popele ne kwisa ako kánice, ne kwinjila umo umwa lu kwaŵe'finani. Kaŵili ka ŵaŵa-aŵa aŵaŵyaŵo, ne ku ka tana. Kaŵili ne ku fuma-mo minwe lukoso, ne ku fika kuli ŵanyina, ne kwipusya ati: Na lelo, mama, ŵa ntana ifinani, Ŵakalama ŵa lu kwaŵa. Kumfwa ŵanyina ati: ŵa leke aŵene ŵa lu kú lya. Popele kumfwa ati: Na ŵa leka. Popele, pa kweŵa ati ŵa isala-ko ŵonse mu musi, ne mfumu ya isala-ko, popele ne ku lapuka ako kánice. uku lu ku yo'ko ukwa li Kalama. A saŋga Ŵakalama ŵa isala-ko. Popele ati: Isuleni-ko Kalama! Popele ne kwisula-ko Ŵakalama, ná ko ne kwinjila. Kumfwa ati: Imfumu ya mwiteni, ya eŵa ati ŋga. ese iciseise, á sye-po iŋguo. Popele ná ŵo Ŵakalama ne ku lapuka matako lukoso. Kumfwa ŵakasi ati: Mwe ŵantu fwaleni! Kumfwa ŵalume ati: Mba mfwale syani, imfumu ya eŵa ati ese iciseise? Popele, pa ku fika mu bwalo, ne ku leluka-ko ako kánice. Ŵakalama ati: ŋga ŵa ŋgiswile-ko Sikulu. Ne ku tuma ŵamukolo ati: Isula-ko! Ne kwima ŵamukolo ne kwisula-ko. Pa kweŵa ati ŵamukolo ŵa ceŵe-ko, ku saŋgana Ŵakalama ŵa lu kwinjila matako lukoso; ne ku fuma -ko uluŵilo ŵamukolo ukú ya ku cipembe uku ya syele imfumu. Kumfwe'mfumu ati: Mba nindo wa tina? Kumfwa ati: Na tina Ŵakalama, ŵa li matako lukoso, iŋguo ta ŵa kwete. Kumfwe'mfumu ati: Ala, wi lu ku mu ŵepesya! Ati: Umukulu e wa kwisa matako lukoso mu mfumu muno? Popele icine ne mfumu ne kwisa kumulyaŋgo ukwa fikile. Kumfwa mba nindo Kalama wa endele'fi? Popele kumfwa ati: Ne mwa ita, Sikulu, mbule uhwisa? Popele imfumu ne kwihala ne ku tuntumana ati: Ulu, Ŵakalama, mba nindo mwa citile'fi? Kumfwa ati: Bweleleni lomba. Ne ku bwelela na kwaŵo ku ŋanda Ŵakalama.

Pa kweŵa ati bwá co'lucelo, kumfwa ati: Keteni Ŵakalama, tumfwepo fwense. Popele icine ne ku ŵeta, ne ku ŵa kaka. Kumfwa ati: Mba pando mwa ŋkakila Sikulu? Kumfwa ati: Mba we ica ku tumine ati kó ya ku mfumu matako lukoso cindo? Olo kumfwa ati: Ica isile mu ku njita kànice. Kumfwa ati: Loŋganisyeni-po utwánice, a tu sinine-po ne ka ile mu ku mwita! Popele ne ku ŵeta aŵánice ŵonse, ne ku ŵepusya umo umo. Tonse ne ku kana; sombi kambi ne ku sumina ati: Ni neŵo, na lile mu kwita Kalama uyu. Mba pando wa mu ŵalile pa ku mwite'fyo? Kumfwa ati: Ni pa ku lu ku ntane'finani; pakuti ŵonse a lu ku ŵá pa. Popele ne ku laŵila ati: Mba pando u lu ku tana kánice ifinani, Kalama? Lelo te kaka ka ku Ioŵa uwa cifolo? Popele apo Ŵakalama ne ku ŵa kakulula.