Uwaba nga mayo

Patile akantu kaikele ngeefyo

Mukwai kwalipo umulumendo umo aleikala nabanyina. Uyu umulumendo alefwaisha ukupa. Balemuletela abakashana abapusana pusana leelo alebakana, aletifye ndefwaya umukashana umusuma nga mayo.

Inshiku shalipitile ishingi. Awe alimine alaya banyina ati, “mayo naya mfwayeko umukashana umusuma nga imwe, elyo nshilaima mpeniko akasembe ne fumo.” Efyo umulumendo atolele nolwendo lwakwe mukufwaya umukashana wakupa. Afikile pamushi umo alaipusha ati, “ndefwayako umukashana wakupa.” Nabo tebakani, efyo bafumishe nabakashana batatu. Awe cilya ashilabamonafye, atile “awe apa tapili uupalile mayo.”

Aima alupita mpaka na kumpela yacalo aleyafye ciye-ye-ye. Aishile monafye akacushi kalefuka pamulu wamuti. Afikile mupepi apika na “odini kuno mukwai.” Umukashana afuma ati “kalibu mukwai.” Cilya umulumendo ashimonafye umukashana, apo aiminine ninsansa sheka-sheka atinokuti nomba namusanga umukashana nalefwaya uwaba nga mayo.

Efyo aebele umukashana ati, “ndefwaya umukashana wakupa.” Nao umukashana atile ati, “naine eco ndolela mwaume wakungupa.” Umulumendo ati, “shiika kumuti tulande.” Umukashsana nao ati, “iyo ine nshiika kumuti, nshinyata panshi.” Umulumendo nao ati, “isankupape”. Nao umukashana temukani. Efyo batampile nakubwela. Mushila umulumendo anaka, epakuninika umukashana kumuti uwali mupepi. Cilya batushakofye panono umulumendo aeba umkashana ati, “shiika tusekepo”, umukashana nao ati “pakubala naciba ninkweba ati ine nshiika kumuti elyo nshinyata panshi.”

Bakonkenyepo ulwendo umulumendo ninshi napapa umukashana mpakafye kung’anda kumulumendo, nabanyina babapokelela. Umukashana ena anina na kumuti. Umulumendo epakuti “mayo, seni mumone naleta umwanakashi wakupa.” Awe notumpundu twalaawilwa ukufuma kuli banyina; “lu-lu-lu-lu lala-lala-lala weyee-weyee-weyee….. kwena wemukashana ulawama! Shiika tukumone.” Umukashana nao ati “mukwai ine nshiika kumuti, elyo nshinyata panshi.” Ubushiku bwa bwinga awe kwali utumpundu namasha. Umulumendo nao pantu aikele umukashana alifye munuma mumulumendo shibwinga. Abantu nabo abati, “ima shibwinga ushanepo amasha.” Nao temukani, aima nomukashi wakwe munuma alafikula na masha shaneni shaneni, nomukashana munuma. Awe abuntu bashimona filya abati, “iwe mukashana shiika uleke umwinamobe ashaneko.” Awe alikene saana ati “bane ine nshika ndi wakumuti.”

Akakote kamo kamona filya kebele, “kanshi shiisa kuno nkupape uleke umulume obe ashane.” Efyo bapapile nabwinga. Shibwinga cilya amona filya ebele, tapekalwa, efyo aingile mubantu nokubutuka.

Akakote palya kekele awe kanaka, kaipusha ati, “bushe shibwinga alikwi?” Awe tewakumoneka, abantu nabo balasalangana, bambi nabakolwa. Nakulu uwapapile nabwinga ashala alelolela shibwinga mpaka efyo aponene panshi afwako na kafwa kanono, umukashana nabwinga efyo aikiile nokubutuka.

Pali kashimi kapela.

Mukwai ubusuma bwa muntu tepameso peka iyo, lelo mutima wamuntu nemicitile yakwe.