Umulunshi wanama

Patile akantu kaikele ngeefyo

Kwali umuluunshi wanama aleti ngaaya mumpanga ateya ifiliba cilya apitanako abwela, asanga utunama natulya ifyakulya fyonse ifyo ateyele mufiliba. Awe ayaikalafye mwisamba lya muti. Aipusha bushe nalayafye ififine ku ng’anda? Puntu ku ng’anda takulipo icakulya nelyo cimo. Lilya achili aletontonkanya ifyakucita, amona ubowa aima nokuswa ubowa atola nobulendo ukubwelelamo kumushi nishi nakasu kaya kaleingila. Awe apela nabakashi baipika efyo balya nokulala balala. Ilyo bwacele ulucelo aima aya kumpanga nakabili, elyo kwaisa imfula iyikalamba nga nshi. Cilya aleeya mushila amona icushi cilefutumuka pakamusakuta apika odi! “Odi kuno!” Tapali uwalemwasuka awe aingile mumusakuta asanga inama nashisula mulya mwine mumusakuta; shimbi shalipikwa, shimbi shibishi, shimbi shalyuma. Ukucilapo, nishi muli nobwali nabanaya. Aloleshaa… amona ati abeene bang’anda tabaliipo, neco ali nensala saana abula ifyakulya alalya. Cilya aikuta, aibukisha ati kung’anda takuli ifyakulya, atotonkanaya ati ‘kambulepo ififine ntwalileko abaana na bakashi bandi kung’anda.’ Asendapo nenama iyaipikwa neibishi elyo nobwali atwalila abaana na bakashi kung’anda balalya. Elyo abakashi bakwe bamwipusha abati “mwafumya kwisa ifyakulya?” Nao aasuka ati “akulyafye! Nishi iwe tawaishiba ukuti ndi mulunshi wanama?” Awe bulecafye, luceeloceelo atola nobulendo kumilimo yakwe mumpanga. Lyonse alecitafye ifyofine basuka abanankwe bamwipusha abati, “bushe mune nikwi ufumya inama?” Nao ukubasuka nakalya. Efyo aile kulya kwine aleya lyonse aingila na mumusakuta atampa nokulya ubwali, kanshi nishi icine camusakuta ciwa. Efyo cabwelele uko caile casanga alelya ubwali nenama nao ati “ndelya mukwai.” Naco catifye “ee mune akulya, ine nine mwine wang’anda pano. Fyonse ifi kuti walya nomba ubufi awe.” Nao ati “emukwai.” Awe efyo aimine aya na kung’anda filyafine aleeya lyonse nefyo asenda lyonse efyo asendele. Elyo abanankwe bomukonka efyo bamubulile bamwipaya bamweba nokumweba ati umulomo tawawama umunobe alekusunga iwe ulemucengesha.

Pali kashimi kapela.