Umwana wamfumu

Patile akantu kaikele ngeefyo

Pali imfumu iyakwete umwana umwanakashi. Epakutuma inkombe ukuyabila imbila ati; “uyo onse uulefwaya ukupa umwana wa mfumu kwisano, kuti aisa munshita yacungulo kasuba pabushiku bwapa mulungu.” Efyo abekala mushi bakolongene kwisano lya mfumu. Imfumu epakubeba aiti “nalikwata umwana umukashana ngefyo mwaishiba bonse mwebakolongene kuno. Leelo ndefwaya ukumufya. Eico uulefwaya ukupo mwana wandi, afwile ukupwisha umungomo wabwalwa uyu uli apa, epakupa umwana wandi.” Kanshi abantu efyo batendeke nokunwa ubwalwa ubwali mumungomo. Kuti uwanwakofye icilingile akolwa, afilwa. Kwaisa umunankwe nao afilwa, kwaisa naumbi afilwa, naumbi afilwa, nabambi nabambi, ifyofine. Elyo kwaishile kalulu ati, “mwe mfumu lekeni naine njesheko ukunwa ubwalwa.” Imfumu epakusumina ninshi umushi onse nabafilwa ukupwisha insupa yabwalwa. Kalulu efyo atendeke nokunwo bwalwa. Cilya anwakofye panono aeba imfumu ati, “shikulu, ndelombako ukuyako kucimbusu?” Imfumu nayo yamusuminisha, kanshi ninshi eshile nabanankwe ba kalulu abengi. Cilya aya kucimbusu, bacinjanya nakanankwe kambi, katendeka nokunwa ubwalwa. Kalenwafye, kalenwafye, kalenwafye mpaka kakolwa. Kabili nakeena kolomba ku mfumu akati, “shikulu, ndelombako ukuya kucimbusu.” Nakabili imfumu yakasuminisha kaya, baya cinjanya nakanankwe kambi. Kabili kwaisa kambi kakonkanyapo ukunwa. Kanwa, kanwa, kanwa, kalenwafye mpaka no bwalwa bwapwa bonse mumungomo. Efyo kalulu aupile no mwana wa Mfumu.

E pali kashimi kapela.