Ico colwa ne nkonshi fyatemwanina

Mu Africa nga waya mu mpanga kuti wasanga ukuti pefye colwa ne nkonshi fyalitemwana saana, nokwenda fyendela pamo. Bushiku bumo colwa aebele nama shimbi ati, “bushe bane teeti twafwane tuipusushe ku ng’wena pantu iletulya muno?” Inama shalikene ashiti, “Awe shikulu ifwe tulatine ng’wena.” Yasuke nkonshi yasosa aiti, “nga wasumina ifi nalasosa ninshi ine kuti nakwafwako.” Colwa aipusha ati, “ngefyo ulepanga mu mano finshi?’

Inkonshi aiti, “tukanwe amenshi yonse ayaba mu cishiba, lyena tukamona apali ing’wena tukaipaye nokuipaya.” Colwa asumina ati, “ee mwandi ico cena camano saana”

Awe inkonshi na colwa baya na ku cishiba batampa nokunwa amenshi. Mwalishiba nemwe ing’wena intu yacenjela. Yati imone ifyo calaba, bwangubwangu yafuma na mu cishiba yafulumukila ku mumana uukalamba uwali mupeepi. Colwa ne nkoshi fyaikonka fyaisanga ileya. Awe fyatampa ukuisumaula nokuyuma. Yasuke ing’wena yaba nefilonda saana, ne cipyu caisa pantu muli shilya nshiku ing’wena yakwete umubili uususma nganshi uwatelela, uwa nakanaka. Colwa ne nkonshi fyabikapo fye ukuisuma yasuka amampolomponkoto yatumba umubili onse, yasanguka fye amanongwamanongwa filya fine yaba na nomba. Awe ing’wena yapikapo fye ukuya, yasuka yafika nakumumana. Inkanda yena ninshi naibiipa nganshi nokutelela nakufulungana.

Ukutampa liya line, colwa ne nkonshi fyalitemwana nganshi. Nga fyaya mukunwa amenshi kumumana filacenjela sana ku ng’wena pantu ing’wena icili ilefwaya ukulandula.