Ifyo imfubu yalufishe amasako yaiko

Kale sana lintu imfubu yaleikala ku mulundu, ninshi tailakuukila ku mumana ukoyatemwisha nomba, yali inama iisuma nganshi. Amasako yaiko yali ayatali ngashi, ayakashikila bwinobwino, kabili ayatikama nga ayakwa cona waku Persia.

Cakwishiba fye kanshi ukuti inama shonse nasho shalekumbwa ukukwata amasako yamusango uyu. Nomba indyabuluba eyalefwaisha ukucila pashibiye. Yasuka yasange nshila iyakuti imfubu ikalufishemo amasako yaiko ayasuma.

Ubushiku bumo kwali impepo. Elyo indyabuluba yasosa ati, “bamfubu mukulu, muli kwati muletutuma. Tekuti mwibile muli cilya cishiba cili kulya icakaba, palibufi muletina amuti amenshi nayakabisha. Bushe amasako yenu ayatikameefi teti yamupokololako? Ata kanshi temasako yeneyene, fyafye!”

Imfubu icilumba caisa yaasuka aiti, “inkanda yandi eyo ikane ukuponkako, inkanda yandi intu umwene fye!” Awe apo pene yawila na mu cishiba icalimo amenshi ayakaba, emo yaibila. Ala mukwai, amenshi ico yakabile kwati nikatwishi, yaifopole nkanda icabiipa nganshi, na masako yaiko yonse ayasuma emisusukile.

Yaisafyampukamo ukuya ku cisihiba cimbi icalimo amenshi ayatalala. Ukufuma lilya line imbufu iikala mumenshi pakutalalikako ifyo yapiile. Indyabuluba yena tayawemye iyoo, yacitile icintu icibi saana ku mfubu iishali no mulandu. Eyalenga ukuti imfubu ibulwe amasako pa mubili.