Ico bakolwe bamonekela nga bantu

Kale saana icakulya calicepele mu calo pantu imfula tayalokele pa myake ingi, ne mbuto tashakulilile iyoo. Basuka abantu abati, “awe ici cakulya cishelepo tutuule mumo, na bakulonda abapupu babepo.” Abo bantu baaleelonde cakulya balibacetekele ukukanalyapo. Awe bushiku bumo basanga balya bantu baaleelonda balelyapo icakulya. Abantu epakufulwa babaleta na ku mfumu kukulubulula.

Imfumu yabeba aiti, “cinecine imwe bonse mulemoneka fye abaina, na maka muli nayo, nico mulya fye icakulya ico bamutuma ukulonda. Nshamwipaya, nkamucita fye icintu icakuti mwikalaba. Ndemwalule nama ishakumoneka fye nga abantu. Na abantu bakulamutamfya uko bali pantu imwe pefye muli bakufwayo kwiba. Mwakulaikala ku miti ku mpepo ne yapamwela, ninshi ifwe tuleonta. Tamwakekale naifwe nakabili.” Abapupu epakwaluka bakolwe. Awe bashimona fye ifyo babiipa, ne nsoni shabeekata babutukila mu mpanga kukubelama.