Ico insofu itiinina impuku

Cumfwika ngobufi icakuti insofu iyakula filya, namaka yakwata, itiina impuku. Kwena cacine insofu ilatiina saana impuku. Abantu bamo batila nico insofu itontonkanya ati impuku nga yaingila mumulembe yaya mukati kuti insofu yapena.

Kamishimikileko umulandu. Patile akantu kaikele ngefi. Insofu yali necilonda ku lukasa. Yatila ntinti ukuti cipole. Awe nakalya, yafilwa fye. Awe bushiku bumo impuku yasanga insofu naikala bulanda-bulanda, ico icilonda calekalipa.

Impuku yaipusha ati, “yangu mukwai bansofu. Bushe cinshi cilekalipa?” Insofu yalondolwela impuku ulwa cilonda caiko. Impuku yebele, “awe mwandi ico cena cabiipa nganshi. Kanshi lekeni misambepo.” Awe apo pene impuku yatampa nokusambika insofu icilonda. Tapapitile nenshiku ishingi, icilonda capola. Insofu epakwebe impuku ukuti, “nkakulambula pali ici waculila.’’

Nomba insofu yalasosa fye ifyo fine nga yamona impuku yaipusha. Ukufika nanomba line tailati ifute impuku. Nomba yasanguka ngo mulwani. Kuti nga yamona impuku yasakamana nokubutuka aiti “nalimo na leelo alenjipusha ulwakumulambula.”