Folk Tale

Ico bamumbwe ne mbwa fyapatanina

AuthorTisa Kabwela
LanguageBemba
OriginZambia

Pakale abantu baleteeke mbwa na bamumbwe pamo kumayanda yabo, ebakubalondelako ifyuma fyo bali nafyo. Umuntu umo aliteekele mbwa na mumbwe. Bushiku bumo alikwete umupusa wa nama uusuma ngashi. Pakufuma pa nganda asha aeba imbwa na mumbwe ati “mucenjele. Mwileeka nangu umo anjibileko inama yandi ii.” Ashifumapo fye, imbwa yatampa nokulye nama.

Umuntu ati abwele ubukali bwaisa. Aipusha ati, “ngo ubulile nama yandi bushe naani?” lmbwa pakwasuka yacita kwati caipesha namano aiti, ”yangu! Bushe tailipo palya? Awe ninshi pali uwaisasenda ili twaciba tulecena na mumbwe panse.”

Mumbwe ashufwa fye ifyo imbwa yabeepa, afulwa aeba ne mbwa ati, “uli wabufi iwe! Niwe wacilye nama nishi ndekumona nokukumona.” Mumbwe aeba na shikulu-wakwe ati, “moneni mukwai, nanomba utuminofu twanama tulya tukambatile na ku kanwa kakwe.” Umuntu epakwikate mbwa, ayuma, ailopola nganshi.

Imbwa yafulwa saana ico mumbwe aisoselela. Yalabesha fye mumbwe. Yasuka yamusuma bubibubi saana, yamutamfya na mu mushi aiti, “nga wabwelelako kuno, nkesakusuma nakabili.”

Eico nanomba mumbwe alatiina ukwikala ne mbwa. Nayo imbwa ngayamona mumbwe, pefye ilamupishe nkusukusu ukuti imwipaye. Nico tailati ilabe filya fikoti bailopawile liya mumbwe aisoselele.


Text view