Icipanga cafulwe ico cakosela

Fulwe enama yalekelesheko pakubumbwa. Ifyashele kukubumbile nama mbiye efyo bakushile nao bamumbilako. Bamupeela ululimi ulwatikama kwati lwa kwa kolwe, umulomo ngo wa cuni, umutwe ngo wa nsoka. Ku mfwa amakasa yakuntashi nokuti yapalamane nayakunuma nakalya. Nomba umwine fulwe ena nokusakamana iyoo, ali fye uwasansamuka saana, baleikala fye akalibumba na bamunyina nga filya ficita bacisongo. Bushiku bumo lufwinyemba aeba fulwe ati, “kanshi iwe mune ico wabiipileefi cinshi?” Fulwe aasuka ati, “ukubiipa kwena nalibiipa cinecine, nomba iminofu yandi yalinunkila sana pa kuilya yacila na panama shimbi shonse. Nga niwe lufwinyemba takwaba nangu umo uufyaya ukukulya.”

Mwalimona nemwe bene ukuti lufwinyemba aba nolulimi ulutali, pamo peene nga bonse ababa notunwa ututali nomulomo baba nao. Na lufwinyemba wine umulomo aba nao saana. Ati omfwe ifyalanda fulwe, aya alelundulula impangayonse. Inama shimbi shati shumfwe ilyashi lya kutila umunofu wakwa fulwe untu wanukila, na cine shatampo kwipaya bafulwe bonse. Asuka no muntu wine atampa ukunwa supu yakwa fulwe.

Bafulwe bati bamona ifyo inama shalabepaya, bayaingila mulupako, bapapata necimuti abati “wemuti ukulelefine.” Asuka nomba fulwe onse akwate cipanga icakasa. Nomba uko bali beeka bafulwe balaumana fye pe, pantu tapali nangu umo uwasumine ati ‘nine nashimike inkaama kuli lufwinyemba ukuti iminofu yesu yalinunkila.’ Basuka baleka nokwikala mumabumba. Na leeloline telingi twingamona bafulwe babili baleenda pamo nico bacilli balifulilwana, eco bendela umoumo.