Ico icipululu cifumina nga bwaila

Kale fye saana, inama shonse ne fyuni kumo fyaleeti icipululu caba na mano saana. Pefye kuti nga kwabe fikansa, bayaita icipululu kukwisaputulo mulandu.

Ubushiku bumo kalulu aisa kukupempula muka cipululu. Kalulu aipusha ati, “bushe mukwai tekuti munjebeko. Pankoko yafiita neyabuuta bushe iyacenjelapo ni ilikwi?” Muka cipululu pakwasuka ati, “ici tacafishe. Nobe wine kalulu ulamona fye pe ukuti inkoko iyafiita eyacenjela ukucila iyabuuta, pantu inkoke iyafiita kuti yabikile lini ilyabuuta. Kumfwe nkoko yabuuta yena tekuti ibikile ilini ilyafiita.” Kalulu ati, “cacinecine mukwai mwasosa fye icishinka, natotela sana mukwai. Nomba imwe apo mwacenjeleefi, bushe kuti mwabikile lini ilyfiita?” Muka cipululu aasuka fye ati “ee, kuti nacita.” Apo peene emifumine, aya na ku lucengo ulukulu, ulwali mupeepi. Abikile lini limo, amona lintu lyabuuta. Awe muka cipululu insoni shamwikata, ati inama shonse shakulanyamba. Epakupanga ati ‘nomba nshakulafuma kasuba, nakulalinga nga bwaila elyo nfumu epakukana monwa.’