Ico icinungi cakwatila amasako ayatwa

Icinungi cali ninama iyatemwa ukutashiwa. Kwena nokumoneka kwine calemoneka ubusaka nganshi. Na pakumfwa uko inama shibiye shilecitasha caletemwa nganshi.

Bushiku bumo caitakisha kuli mumbwe acita, “mwandi inama shonse ashiemba nga ine, ne caalo nga caliwamishapo ukucila.” Mumbwe nao pakufwe fyo, camukalipa, mumutima ati ‘nokuti mwa! Lekeni nkamufulunganishe ukuemba kwakwe akacenjele!’

Mumbwe pakulanda abwesha na pa pumi alaba kwati waluse, ati “mune cinungi, mu cimpusa cilya icamyunga emwaikala uwakuti ifi iwe wawama wena kuti akulunidilapo no busuma nabumbi. Ngawayako wayamwipusha, kuti ayakubombela. Cikulu pakuyoko ushe amasako yobe aya ayasuma kuli ine, epali yayaonaika pa nshita alekubombela.”

Awe nakabushe iciwelewele icinungi eko caya. Caya mukuipatikisha pakwingila mucimpusa. Imyunga iitali nganshi yacilasaulo mubili onse cafilwa nokuinukula.

Mumbwe aseka nokuseka ati, “eya mwandi mona umubili onse ifyo wasakalala ku fimyunga! Leelo pa fimyunga fyaleepafi kuti epo wailika amasako yawameefi? Awe kanjafwale fye nine.”

Eico mumona mumbwe na masako ayasuma, ayatikama. Kumfwe cinungi cena impelwamano caba fye na masako ayatali ayatwa, ayabiipisha, emifwalile yaciko, nokuitakisha kwine nomba kwalipwa. Teeti ciitakishe ukuyemba nakalya.