Ico ifyuni fimbila

Patile akantu kaikele ngefi. Ifyuni no tususu fyali ifyatemwana nganshi. Munshiku shilya ishakale, utususu nangu ifyuni fine tafyalepupuka iyoo. Ifyuni fyena tafyaishibe nakwimba ngefi shino nshiku ficita nakalya. Kabili ifyuni no tususu fyalesanswa fye pe kuli bacona abalwani bafiko, fyaleipaiwa ifingi saana. Twasuka utumabumba twa fyuni no tususu utwashelepo twateeka icilye cakulomba Lesa Mukulu atwafweko, atupeleko inshila yakupusukilamo ku balwani bacona pantu bacona balikwatishe amaka.

Lesa Mukulu ati omfwa uyu mulandu akutumana fye. Alatontonkanya. Asuka apingula ati ‘cinecine aba bantu bacula muno. Kambapeleko amapindo pakuti belepupuka pakubutuka abalwani baabo.’

Ifyuni fyati fyumfwe aya amashiwi, fyasansamuka saana, fyapona na mulwimbo lwakutasha, e ulu nanomba line ficili fiibukisha. Utususu twena twaisakamana fye utwine, twafumpukapo fye twalaba nakukutasha. Lesa Mukulu epakutila ‘awii kanshi utususu tatulingile ukwendela pamo ne fyuni. Utususu twena kanshi twakulaenda ubushiku ilyo kushili na kasuba lintu ifyuni fyaangala fyatendwa fyalala.’