Ico cuula alilila owaowa

Patile akantu kaikele ngefi. Kale cuula alelila fye busakabusaka nga akacuni. Ubushiku bumo cuula na kwindi baile balatandala. Basanga umupika na manamamo yalepya ‘bwabwabwabwa’. Kwindi aebo mubiye ati, “mune natulye ii nama abene tabalaisa. Utale usonde umfwe nga naipya bwino. Ine nakulalengula mone nga kuleisa abantu.” Cuula ati, “ee, nomba mune wilaba kunjeba bwangu nga wamona baisa.” Awe cuula akumba na mu mupika, asalamo no mupusa wa nama uwaliko nomuto, aufundaisha na mu kanwa.

Palya pene no mwine mupika aisa. Awe kwindi ico wamwenso afulumuka nolubilo, nokuti acenjesheko umubiye nakalya. Cuula ena icakucita cabula. Atala fye abotelela acita ngoouli mu tulo. Umupusa wa nama walamoca mu kanwa, neco wakulishe, afilwa nokuumina calakalipa saanasaana mukanwa, nomba ukusakunya iyoo ico aletina ati nga baishiba ukuti inama ili mu kanwa balenkanda cinecine. Inshita yapite ikalamba, ashipikishe fye. Asuka umwine mupika apwa ukulya, aya nokuya. Cuula ukupusuka kwena apusuka.

Ubushiku bwati bwile, cula ati eshe ukwimba ngefyo emba nakale, awe afilwa, alawowota fye ico kumukoshi kuli ifilonda. Awe calala cabelela, mpaka nalelo.