Ico inkoko shipalilo mushili

Bushe mwalitala amumona uko utwana twa nkoko tulepalo mushili nangu papita fye ubushiku bumo apo twatotwelwa?

Akale saana ba kapumpe tabalepupuka, baleangala fye pamo ne nkoko. Bushiku bumo kapumpe umo atole nshindano yabwanga, eyo abilinkanyako amasako yakwe, amona nokupupuka kwasumina. Inkoko shati shimone uko cibusa washiko alapupuka mu mulu busaka busaka shakumbwa ashiti, “yangu cinnecine bane moneni kumunesu. Kanshi nefwe naga tulapupuka kuti cawama ngashi.”

Cilya kapumpe aika shamweba ashiti, “mukwai twashimeniko inshindano naifwe nga twalapupuka kuti cawama ngashi.” Kapumpe akana ati, “iyoo. Epali mwalufya kabili tukapatane.” Inkoko shaasuka ashiti, “shimuletucetekela! Twakulasunge nshindano yenu bwinobwino.” Asuka kapumpe asumina, ashashime nshindano yabwanga. Nomba alisheba ati “ngayalube nshindano tukapatana penape.”

Icamupamba, inkoko imo yati “mbalilepo ukubililako” awe inshindano emilubile. Kapumpe pamo nabamung’ina na bakashi bakwe bafulwa ngashi, batampa nokwipaye nkoko abati “noba twaba abalwani benu mpake nshindano ikamoneke.”

Eico nanomba inkoko shitila nga shamona kapumpe alepupuka, shabutuka, shayabelama. Nga shamona aya elyo shabwela kabili kukupalo mushili. Nanomba shicili shilefwaya ilya nshindano yalubile kale.