Ico imbuni yakwatilo mukoshi uutali

Pakale saana ilyo imbuni yali no mukoshi uwipi, babiikene icibusa ne ng’wena. Inama shimbi shalyebele mbuni ashiti, “we muntu we! Ulya muleangala nankwe temusuma iyoo, talingile kubikana nankwe cibusa.” Nombe mbuni mwalishiba nemwe, ubukulu bwena cuni icikulu saana, leelo akamutwe kaiko kanono sana, eco na mano yeene yashafulila. Tayaumfwile nefyo baipingwileko nakalya.

Bushiku bumo ing’wena yaumfwe nsala saana, pantu papitile nshiku shimo ukwabulo kuti ilye nangu kamo. Awe yaebe mbuni aiti, “mune, ine ilino limo lilekalipa. Mune ingisho mutwe obe mu kanwa kandi umone ililekalipa.” Awe imbuni nayo cipube cinecine, yacite fyofine. Awe ing’wena no bubi bwaiko bwasokoloka. Yafubata umutwe wa mbuni.

Imbuni yatinta, yatinta mwe! Umo iletina wasuko mukoshi wanyunsuluka, walepelako. Ing’wena nayo yasuka yanaka, yaileka. Imbuni epakufulumuka. Yacenjela nomba. Yalaikala mu cipya umuli umusesenga, teyakupalama ku mumana ukufwile kwabe ng’wena. Na nomba line nifi fine.