Chitupu chandi

Patile akantu kaikele ngefi.

Pali umulumendo umo ali nomukashi. Uyu umulumendo ali uwakucuula kumukashi wakwe. Kuti nangu naleta ifyakulya nangu taletele cimocine.

Bushiku bumo uyu tata alitolele ubulendo bwakuya fwaya ifyakulya atile “naya mukufwaya ifyakulya”. Ilyo aleya aleilishanya pamulandu wamikalile yakwe ico tabaleumfwana nomukashi wakwe. Uyu shikulu bantu mubulendo bwakwe alishile kumanya icuuni icikalamba nganshi epakucilondolwela ubwafya akwete. Icuni epakumweba ati, “kwena shikulu fintu wanjeba nalakwafwa mukukonka namashiwi wanjeba. Senda aka kacoola uye kaposa mumumana, pakuya pamumana ufwile waya uleimba ilwembo ati:

Chitupu chandi mbikile pali Bemba tupuka Chitupu chandi mbikile pali Bemba tupuka Nine Shimwansa waisambikile pali Bemba tupuka”

Mukwai uyu shikulu bantu akacoola akamupele icuni nokuyaposa pali Bemba, efyo atolele nobulendo ukubwekelamo kumushi ninshi naipaya nemfuko shibili. Awe umukashi wakwe amupokelela nensansa atile “mwabombeni mukwai.” Uyu shikulu bantu nelyo acitile ifi balemutana ifyakulwa kumukashi wakwe. Bushiku bushilile kantu alitolele ubulendo nokubwekelemo kumumana, cilya afika mupeepi nomumana alaimba nolwimbo ati:

Citupu candi mbikile pali Bemba tupuka Citupu candi mbikile pali Bemba tupuka Citupu candi mbikile pali Bemba tupuka Citupu candi mbikile pali Bemba tupuka Nine shimwansa waisa naisa kutupula tupuka

Awe icitupu catupuka. Awe shikulu bantu aipakisha nokulya amakoko namanama. Kashi kunganda nga bamwita kukulyo ubwali awe alashinshimukilafye cilya alyakofye panono aima ati ‘naikuta.’

Bushiku bushilile kantu, umwana wakwe umwaume alimine nokukonka wishi panuma ilyo atolele ubulendo bwakubwekela kumumana umuku wakulenga butatu. Cilya wishi nga alolesha kunuma, umwana afisama. Cilya bafika kumumana umwana anina nakumiti uwapalamine mupeepi nomumana alatamba wishi ifyo alecita. Mukwai wishi alaimba nolwimbo ati:

Citupu candi mbikile pali Bemba tupuka Nine shimwansa waisa naisa kutupula tupuka

Awe naco catupuka. Leelo umwana alemonafye ifyo wishi alechita. Cilya wishi afumapo awe umwaiche aya napa citupu anina napaculu nokufumya fyonse ifyali mucitupu alalya leelo ifyashelepo alisendele kumushi nokutwalila abakung’anda nabo epakumupokelela nensansa. Elyo asosa ati “batata balafisa ifyo bacita. Balikwata icitupu kumumana.” Efyo balile ifyakulya fyonse bapwa.

Cilya wishi abwelela kucitupu asanga ifyakulya fyonse nabapwa. Awe calimusungwishe nganshi alaikalafye nensala. Nao umwana alalyafye ifyakulya nabanina mpaka ifyakulya fyonse fyapwa, leelo uyu tata ena afwilefye nensala.

E pali kashimi kapela.

Mukwai ifyakusokolwela umunobe naiwe fisokolole.