El llobu y el raposu

Yera una vez un llobu que quería zampar a un raposu. Diba corriendo tres d'él pel monte cuandu s'atoparon con un paisanu que taba cargando un carru lleña.

El raposu pegó un blincu al carru y del carru a un árbol cercanu. Entós el llobu echóse tres del carru a esperar.

Diz-y el raposu al paisanu:

-¡Eh, paisanu! ¿Qué ye eso que tu ahí tres del carru?

Y el paisanu, que ya viera al lhbu y tamién-y tenía mieu, contestó:

-Pue que seya un troncu.

-Si ye un troncu ¿por qué nun lu eches en carru?

El llobu, que taba al quite, díxo-y al paisanu polo baxo:

-Sí, sí, échume'n carru.

D'una brazada, el paisanu echólu'n carru, comu si fuere un troncu. Y güelve otra vez el ruposu:

-Esi troncu va cayete, ¿por qué nun lu ates un puquiñín?

-Faite que m'ates, peru nun m'ates -faló'l llobu.

L'home fízose que lu ataba y atólu de verdá.

Entós el raposu, un pocu más gayoleru, diz-y al paisanu:

-Esi troncu qu'acabes d'atar, paezme demasiao gordu; ¿por qué nun lu desfaes col hachu?

El llobu, que ya nun les tenia toes consigo, dixo-y al home:

-Faite que me das, pero nun me des, ¿eh?

El paisanu fízose que-y daba y dió-y un bon hachazu na cabeza y matólu.

Baxó'l raposu meneando'l rau mui ufanu, averóse al paisanu y dixo:

-¿Qué me vas dar agora que t'ayudé a cazar al llobu?

-Tengo una pita con pitos, ¿gustaránte?

-Si, si, gústenme munchu.

Baxaba'l raposu llambiéndose de pensar na fartura que-y esperaba. Cuandu taben cerca'l pueblu, dixo-y al paisanu que ya nun s'atrevía dir más abaxu.

-Nun t'apures, hom, que teo de traételos yo nuna maniega tapaos con un sacu.

En llugar de la pita colos pitos que-y prometiera, el paisanu metió na banastra una perra que tenia unos perracos, ya algo granducos y pergafientos. Atapólos col sacu y fue al encuentru'l raposu. Encuantes que'l raposu lu devisó escomencipió a ponese nerviosu:

-Güelme a perrizu.

-¡Qué va, hom; tú tas llocu! Espera a que desatape la banastra y verás qué pita más gorda te traigo.

Al dicir estes pallabres, el vaina del paisanu desatapó la banastra y salieron, corriendo a tou meter, la perra y los perracos tres del raposu, que diba retolicando:

-¡Arriba culu, arriba zanques, qu'esti mundu tou ye trampes!

Encuantes que se punxo a salvu, falaba ansina'l raposu:

-¡Ai Dios, patines, cuántu me valiestis!: S i nun ye por vosotres algámenme los perros.

-¡Y yo! -diz-y el rau.

-¡Non, tú non, que tú tirabes patrás.

Y yera porque los perros teníenlu engancháu pel rau y tiraben patrás per él.